Komisioni i Ankesave dhe Sanksioneve (KAS) është mbledhur këtë të premte për të shqyrtuar kërkesën e Partisë Demokratike për pavlefshmërinë e rezultatit zgjedhor në qarkun e Elbasanit. Megjithatë, seanca u ndërpre përkohësisht pas një përplasjeje verbale mes relatorit të çështjes, Ilir Rusmaili, dhe përfaqësuesit të PD-së, Marash Logu.
Gjatë fjalës së tij, Logu ngriti dyshime mbi transparencën e marrëveshjes së Komisionit Qendror të Zgjedhjeve me kompaninë postare DHL, duke përmendur një deklaratë të komisionerit shtetëror të zgjedhjeve, sipas së cilës janë kursyer rreth 2 milionë euro për shkak të parregullsive në zarfe, si mungesa e nënshkrimeve apo pranimi i vetëm një vizë.
“Kostoja për marrjen dhe dërgimin e një zarfi është 37.5 euro. Nëse KQZ thotë se kurseu 2 milionë euro, a do të thotë që mungojnë nënshkrimet në të paktën 53 mijë raste?” – deklaroi Logu.
Reagimi i relatorit Rusmaili ishte i menjëhershëm, duke kërkuar qetësi në sallë dhe duke akuzuar Logun për nervozizëm dhe fjalime pa leje. “Duhet të qetësohesh dhe përgatitesh të mos krijosh incidente. Nuk janë të mira për procesin. Do bëjmë 10 minuta pushim”, u shpreh ai.
Pas përplasjes, mbledhja u ndërpre për një pushim të shkurtër, ndërsa pritet të rifillojë për të vijuar me shqyrtimin e pretendimeve të opozitës.
