Gjykata Kushtetuese i është përgjigjur deklaratës së kryeministrit, i cili e cilësoi si “një praktikë unike, e padëgjuar më parë në historinë e shteteve – që gjyqtarët t’ia caktojnë vetes pagat përmes gjykatës”, kërkesën e re të Unionit të Gjyqtarëve për rritje të pagave. Në reagimin e saj zyrtar, Gjykata Kushtetuese thekson: “Gjykata Kushtetuese siguron publikun dhe palët në proces se ajo është e pavarur në ushtrimin e funksionit të saj kushtetues dhe nuk ndikohet prej tyre në veprimtarinë apo vendimmarrjen e saj. Gjykata rithekson se vendimet e saj mund të jenë objekt kritikash; megjithatë, çdo formë ndikimi apo përpjekje për të vënë në dyshim autoritetin dhe reputacionin e saj – qoftë edhe në dukje – është e papranueshme, pasi cenon vetë parimet themelore të shtetit të së drejtës dhe të ndarjes e balancimit të pushteteve.” Më herët, në rrjetin social X, kryeministri Edi Rama reagoi ashpër ndaj kërkesës së re të Unionit të Gjyqtarëve për rritje pagash, duke deklaruar: “Për herë të dytë brenda tre viteve, Unioni i Gjyqtarëve kërkon sërish rritjen e pagave përmes gjykatës. Një praktikë unike, e padëgjuar më parë në historinë e shteteve – që gjyqtarët t’ia caktojnë vetes pagat përmes gjykatës – ka ndodhur në Shqipëri, në vitin 2022, kur ky Union kërkoi nga Gjykata Kushtetuese që paga bazë e gjyqtarëve të ekuivalentohej ose me pagën bazë të Drejtorit të Departamentit në Kryeministri, ose me një përqindje të pagës së Presidentit, sipas dëshirës së gjyqtarëve. Dhe Gjykata Kushtetuese e pranoi kërkesën – me një shurdhëri mbresëlënëse ndaj kundërshtimeve të forta të qeverisë, si palë në proces – duke garantuar një pagë bazë të lidhur prej 156.000 lekësh.” Sipas kryeministrit, kjo vendimmarrje ka qenë aq e favorshme për Unionin, sa ata kanë kërkuar përsëri rritje pagash. “Kjo ndërhyrje skandaloze e gjyqësorit në kompetencat e ekzekutivit, mesa duket, u ka shijuar aq shumë, sa pas rritjes së pagave të administratës në maj 2023, Unioni i Gjyqtarëve tani i është drejtuar sërish gjykatës për të kërkuar rritje tjetër të pagave. Këtë herë, Unioni kërkon që paga bazë të lidhet vetëm me atë të Drejtorit të Departamentit në Kryeministri dhe, njëkohësisht, kërkon ndryshimin e ligjit.” Reagimin e kryeministrit, Gjykata Kushtetuese e konsideron të papranueshëm dhe si një formë ndikimi, si dhe një përpjekje për të vënë në dyshim autoritetin e saj.
