Kryetari i Partisë Demokratike, Sali Berisha, ka komentuar sot në një konferencë me gazetarët propozimin e deputetit Agron Shehaj, që partitë opozitare të dalin me një kandidat të përbashkët, por jopolitik, në zgjedhjet e ardhshme për Bashkinë e Tiranës.
Berisha u shpreh se e mbështet plotësisht idenë për një kandidat të përbashkët, por theksoi se nuk është dakord me kriterin që ai të jetë “jopolitik”.
“Për të dalë partitë opozitare me një kandidat këtë e mbështes plotësisht, por që të pretendohet të zgjidhet kryetari i Bashkisë së kryeqytetit një njeri jopolitik këtë nuk e kam dëgjuar ndonjëherë,” u shpreh Berisha.
“Sepse të paktën duhet të ketë një program ku çmonton të gjithë batërdinë bazuar në politikën e narkoshtetit. Nuk e di ç’nënkuptohet me një kandidat jo politik, por për një kandidat të përbashkët, plotësisht e drejtë.”
Në të njëjtën konferencë për mediat, Berisha publikoi një dokument që, sipas tij, është procesverbali i rezultatit të votimeve në qendrën e votimit në burgun e Elbasanit. Ai ironizoi faktin që kandidatja e Partisë Socialiste, Sara Mila, ka marrë 92 nga 102 vota të vlefshme, duke e cilësuar atë si “princesha e burgut”.
“E patë besoj. Ja. Një bandit që futet. Me gisht revolje. Është qendra e votimit e burgut të Elbasanit. Në të cilën Sara Mila, famozja Sara Mila, është njeriu më i adhuruar në burgun e Elbasanit. A mund të imagjinoni ju? Nga 102 vota të vlefshme, e adhuruara pafundësisht Sara Mila merr 92 vota,” tha Berisha me ironi.
Sipas tij, ky rezultat është tregues i ndikimit të krimit dhe të grupeve të strukturuara në procesin zgjedhor, veçanërisht në institucionet e vuajtjes së dënimit.
“Sepse burgun e kontrollojnë totalisht ata që kontrollojnë Ulëzin. Dhe Ulëzin e kontrollojnë vetëm bandat. Princesha e burgut Sara Mila. S’ke ç’ti thuash,” vijoi ai.
Duke vijuar me akuzat e tij, Berisha përmendi dhe emrin e Emiljano Shullazit, duke thënë se:
“Shullazi, Ulëziu, i ngarkoi 313 dhe Shullazi, nën terror, ka detyruar Emilin e partisë që të burgosurit të votojnë për kandidatin e partisë. Ja pra këto ishin zgjedhjet. Farsa. Urdhëroni. Princesha e burgut.”
Deklaratat e Berishës vijnë në vazhdën e kontestimeve të opozitës ndaj procesit zgjedhor, i cili, sipas tyre, është shoqëruar me manipulime, presione dhe përfshirje të grupeve kriminale.
