Adriatik Lapaj dhe Agron Shehaj kanë shkëmbyer akuza në distancë lidhur me atë çka përfaqësojnë në politikë. Lapaj, disa ditë më parë, e ka konsideruar Agron Shehajn si “njeriun që të gjithë e shohin dhe konsiderojnë biznesmen”. Mesa duket, Shehaj është ndjerë i bezdisur nga kjo deklaratë dhe sot, me anë të një video-mesazhi, i ka kthyer përgjigje Lapajt duke e akuzuar si të paguar nga lekët e pista dhe nga Edi Rama.
“Adriatik, ne jemi shumë ndryshe. Unë nuk financohem nga paratë e pista. Unë nuk kam marrë dot pronat e mia, jo më të përfitoj nga ish-pronarët që ju keni korruptuar, gjyqtarë të korruptuar, avokatë sekserë. Ti ke qenë dhe je pjesë e këtij sistemi, Adriatik. Unë jam si ata mijëra qindra shqiptarë që kanë vuajtur këtë shtet të korruptuar, këtë sistem të padrejtë, atë drejtësi të korruptuar ku ti ke ngrënë, Adriatik. Kjo është diferenca midis teje dhe meje. Adriatik, unë jam i pakapshëm. Të fala Ramës, Adriatik,” – thotë Shehaj në video-mesazh, ndërsa kjo nuk është hera e parë që ai dhe Lapaj përplasen për çështjen e përfaqësimit politik.
Adriatik Lapaj, së fundmi, nuk ka përtuar t’i sulmojë partitë e reja dhe kryetarët e tyre, duke u përpjekur t’i krijojë vetes hapësirë më të madhe në TV dhe rrjete sociale. Edhe pse publikisht bën thirrje për bashkim me forcat e tjera opozitare, Adriatik Lapaj deri më sot nuk ka treguar ndonjë vullnet për t’u afruar vërtet me partitë e reja opozitare. Mesa duket, strategjia e tij për të qenë “agresiv” për hir të publicitetit po funksionon, për sa kohë pas përplasjes gati fizike me Arlind Qorin, tashmë konflikti mbetet i hapur me Agron Shehajn. Me gjasë, “Mundësia” që “Shqipëria bëhet” me Lapajn dhe Shehajn duket, në mos e vështirë, tashmë e pamundur.
