Gjykata e Lartë ka caktuar datën 11 mars për shqyrtimin e çështjes penale ndaj ish-deputetit Ervin Salianji, i dënuar me 1 vit burg për kallëzim të rremë. Dosja do të trajtohet nga kolegji penal, me relator Sokol Binajn.
Salianji u shpall fajtor për kallëzim të rremë, pasi, sipas gjykatës, krijoi prova të falsifikuara kundër vëllait të ish-ministrit të Brendshëm, Fatmir Xhafaj, me qëllim nisjen e ndjekjes penale ndaj tij.
Ai publikoi një audiopërgjim të pretenduar mes Geron Xhafajt dhe Albert Veliut, i njohur si "Babalja", ku flitej për çështje droge. Ky audiopërgjim u konsiderua mashtrim nga autoritetet.
Pas denoncimit të Salianjit, vëllai i Fatmir Xhafajt u largua në Itali, ku vuajti një dënim për trafik droge.
