Adriatik Lapaj dhe Lulzim Basha kanë akuzuar sot Edi Ramën se i ka kopjuar programin e partisë “Shqipëria Bëhet” për sigurimin e ushqimit për nxënësit e shkollave 9-vjeçare.
“Kopjac i keq! Kur thosha këtu e 1 vit rresht do e bëjmë shkollën me drekë dhe pas-shkollor, më turreshin patronazhistët: ku do i gjesh lekët,” shkruan Lapaj në një status në Facebook.
Ndërkohë, i ashpër në akuza për vjedhje idesh është edhe Lulzim Basha i demokratëve euroatlantikë. “Tani, në prag të zgjedhjeve, mori një propozim nga programi ynë dhe thotë se do ta realizojë. Kur s’ke vizion as aftësi, e ke të vështirë dhe të kopjosh,” shkruan Basha po në Facebook.
Tani, duke qenë se ushqimi në shkollat 9-vjeçare është një praktikë e konsoliduar në arsimin perëndimor prej disa dhjetëvjeçarësh, a mund të ndodhë që edhe Lapaj apo Basha e kanë marrë këtë ide diku tjetër? Ose, thënë ndryshe: këta kanë merakun e ideve të kopjuara apo të realizimit të tyre?
Për fat të keq, nuk u ka mbetur shumë për të shpikur diçka që vendet e zhvilluara nuk e kanë bërë tashmë. Ndoshta mjafton thjesht të kopjojnë. Madje, të kopjojnë sa më mirë, që të na ofrojnë standardet e atyre që i kanë bërë gjërat më mirë dhe më herët se ne. Nuk është garë idesh që të tjerët i kanë realizuar prej shumë vitesh, është garë për të fituar me Ramën dhe për të realizuar premtimet.
