Kreu i KQZ Ilirian Celibashi dhe Komisioneri për Mbrojtjen e të Dhënave Personale Besnik Dervishi u kanë bërë apel zgjedhësve, partive politike, organizatave dhe palëve të tjera të angazhuara në procesin e zgjedhjeve të 11 majit që të kenë kujdes në respektimin e ligjit sa u përket administrimit dhe përpunimit të të dhënave personale në kuadër të veprimtarisë zgjedhore.
“Duke marrë parasysh rreziqet e mundshme që mund të sjellë përpunimi i paligjshëm i të dhënave personale të zgjedhësve, inkurajojmë qytetarët dhe subjektet zgjedhore që, në rastet kur evidentojnë shkelje apo cenim të të dhënave personale, të ankohen pranë Zyrës së Komisionerit për të Drejtën e Informimit dhe Mbrojtjen e të Dhënave Personale,” theksohet në deklaratë.
Në fakt, KQZ është institucioni që, para së gjithash, duhet të kujdeset për të dhënat personale, kryesisht të diasporës, të dhëna që qartas po kalojnë nëpër “filtra” të partisë në pushtet. Sa për mbrojtjen e të dhënave personale, edhe më qesharake duket kur KQZ dhe Komisioneri për Mbrojtjen e këtyre të dhënave bëhen bashkë për deklarata të tilla. Ndërkohë, patronazhistët, një skandal i evidentuar nga opozita në zgjedhjet e vitit 2021, vijojnë të jenë prezentë dhe funksionojnë duke dhunuar të dhënat personale të shqiptarëve, të cilat prej kohësh janë në zotërim të Partisë Socialiste.
