Një incident i rëndë ka ndodhur disa ditë më parë (30 janar) në Korçë, ku një pacient i shërbimit të Hemodializës tentoi të vetëdigjej në shenjë proteste ndaj kushteve të dobëta të trajtimit. Ai kishte ndërmend t’i vinte flakën edhe Repartit të Dializës, duke shprehur kështu indinjatën e tij për nivelin e shërbimit që ofrohet.
Ngjarja ka rikthyer në vëmendje problematikat e shumta që shoqërojnë këtë shërbim jetik për pacientët, të cilët vazhdojnë të përballen me sorollatje, mungesë të mjekëve specialistë dhe kushte të papërshtatshme trajtimi.
Deputetja e Partisë Demokratike dhe kryetarja e Komisionit të Shëndetësisë, Zheni Gjergji, ka reaguar ashpër ndaj kësaj situate, duke denoncuar publikisht koncesionin e Hemodializës, i cili sipas saj nuk ka sjellë përmirësim të shërbimeve, por vetëm pasurimin e disa individëve të lidhur me interesa private.
Në një postim të bërë së fundmi, ajo ngre dyshime serioze për përfitimet financiare nga ky koncesion, që sipas saj po pasuron Klod Allajbeun, ndërsa pacientët vuajnë për kujdesin bazik shëndetësor. Deputetja ka kritikuar gjithashtu mungesën e kontrolleve nga autoritetet shëndetësore dhe transparencën për shkallën e mortalitetit të pacientëve që marrin këtë shërbim.
Sipas Gjergjit, për këtë koncesion shpenzohen 21 milionë euro në vit, ndërkohë që cilësia e filtrave, mungesa e specialistëve dhe kushtet e dobëta të trajtimit mbeten shqetësime të pazgjidhura.
Ajo kujton gjithashtu një incident tragjik të ndodhur në vitin 2016, kur një pacient i vuri zjarrin pavionit të Hemodializës në Spitalin Amerikan, pas një konflikti për ndarjen e ambienteve dhe makinerive, ku për pasojë humbën jetën dy pacientë.
Deputetja Zheni Gjergji kërkon hetim të menjëhershëm dhe mbikëqyrje të rreptë nga autoritetet përgjegjëse, duke theksuar se çdo vonesë ndikon drejtpërdrejt në jetën e pacientëve.
Postimi i plotë i deputetes Zheni Gjergji:
“Konçesioni i Hemodializës, shërbimi që po pasuron Klod Allajbeun!
Edhe pse sot dolën lajme përgënjeshtruese rreth situatës në qendrën e Hemodializës Korçë, problematikat e këtij shërbimi nuk mund të fshihen më!
- Asnjë kontroll nga autoritetet përkatëse shëndetësore për cilësinë dhe performancën e këtij shërbimi nuk janë kryer deri më sot!
- Asnjë e dhënë për shkallën e mortalitetit të këtij grupi pacientësh nuk është bërë publike deri më sot!
- 21 milionë euro në vit për konçensionin e Hemodializës, ndërkohë që pacientët ankohen për kushtet e shërbimit, cilësinë e filtrave, mungesën e mjekëve specialistë si angiokirurgët, kardiologët, endokrinologët, reanimatorët.
- Ku shkojnë paratë e shqiptarëve, kur nuk shkojnë për shërbim shëndetësor?
- KLSH ka konstatuar shkelje e dëme financiare, ndërkohë që autoritetet përgjegjëse nuk kanë reaguar ende!
Çdo vonesë në hetim ndikon në jetën e qytetarëve që marrin këtë shërbim!
Boll më me fasada! Shqiptarët kanë nevojë për trajtim dinjitoz dhe jo propagandë!”
