Nga Kuvendi i Kombëtar i Partisë Socialiste, kryetari i saj dhe njëherësh kryeministri Edi Rama pranoi publikisht se partia që ai drejton ka bërë reformën në drejtësi. Dhe sipas tij, falë Partisë Socialiste, Shqipëria ka shansin historik të ndërtojë një shtet të së drejtës me çdo dhimbje, me çdo kosto me çdo çmim. Kryeministri u shpreh se Reformën në Drejtësi e bëri PS jo për të luftuar kundërshtarët nëpërmjet drejtësisë, por për t’u dhënë për herë të parë në histori shqiptarëve shansin real të ndërtimit të një shteti shqiptar të së drejtës. Ndërsa mbi opozitën nuk i kurse sulmet, për të cilën e krahasoi me "qenin". “Dhe në fund ata do t’ju thonë ‘shiko ka ardhur koha që Edi Rama dhe PS të iki’. Dhe ju do t’i thoni vetes dhe atyre po ne do ikim, por do ikim vetëm përpara dhe sa më shumë të na lehin nga mbrapa, aq më shumë do të ikim përpara, se aq më larg do të duam të jenë zërat që na gërricin veshin me lehjet e tyre”, tha Rama. Për Ahmetajn, Rama tha se sot janë në duart e drejtësisë ose në kërkim prej saj, ata që deri dje ishin në radhët e PS dhe të qeverisë, madje edhe një karrige larg tij. “Problemi ynë as këtë herë nuk do të jenë kundërshtarët, por do jetë llumi i kënetës së tyre që këtë herë do të vërshojë edhe më shumë tërbim për të errësuar sa më shumë sy, për të mërzitur sa më shumë zemra dhe për të ftohur ndaj nesh sa më shumë njerëz. Nuk do t’ia dalin, përkundrazi kanë për ta marrë mbrapsht syve siç e meritojnë, por na duhet shumë durim dhe vendosmëri e këmbëngulje deri në fund të këtyre 100 ditëve".
