Kryeministri këshilloi sot efektivët e Policisë Rrugore që, kur të ndalojnë një qytetar me makinë, ai duhet të respektohet në maksimum, pasi po i merret kohë nga puna e tij. Nuk dihet nëse kryeministri ka pasur parasysh me këtë rast ndalimin e “çunave” të fortë apo atyre të baballarëve me pushtet, por me gjasë Edi Rama nuk ka pasur në mendje asnjë nga rastet e fundit, kur një oficer i Policisë Rrugore tentoi vetëvrasjen pasi u përfshi në një vorbull shkeljesh procedurale nga policia, ministria dhe AMP, të gjitha të vëna në lëvizje pas ndalimit të djalit të biznesmenit Samir Mane.
Rasti i denoncuar vetëm nga një pjesë e vogël e medias u fsheh nga Ministri i Brendshëm, Drejtori i Përgjithshëm i Policisë dhe opozita. Dhe sigurisht nuk mund të bënte përjashtim as kryeministri, i cili sot, pa përfillur ngjarjen e rëndë dhe mungesën e hetimit apo transparencës, thjesht foli për arritje imagjinare të policisë dhe përsëriti propagandën bajate të Rilindjes. Se çfarë respekti mund të ketë policia për një qytetar, kur vetë qytetarët policia i ndan në të “nënës” dhe “njerkës”, këtë vetëm Edi Rama mund ta shpjegojë.
