Debatet në parlament janë fokusuar sot te vota e diasporës. Nga foltorja e Kuvendit, kreu i PD-së, Sali Berisha, u bëri thirrje shqiptarëve të përgatiten për demonstrata të fuqishme para ambasadave, nëse nuk votohet ligji që u njeh atyre dokumentet biometrike, që faktojnë identitetin e tyre.
“Ky tha Berisha, është i vetmi vend që nuk njeh dokumentet biometrike, as të BE-së, as të hapësirës së NATO-s, as të vendeve të tjera, sepse keni frikë dhe tmerr nga vota.”
Në fakt, PS dhe PD ranë dakord disa muaj më parë për votën e emigrantëve dhe mbylljen e listave. Marrëveshja asokohe u konsiderua një sukses nga të dyja palët, por mesa duket llogaritë e mëvonshme nuk i dolën për mirë PD-së, e cila tashmë kërkon ndryshime që nuk i vijnë për shtat PS-së. Me gjasë, palët e kanë të pamundur të gjejnë një marrëveshje për votën e emigrantëve, pasi koha e mbetur dhe vullneti i tyre nuk premton për një konsensus.
