Kryeministri Edi Rama dhe ministri i Brendshëm, Ervin Hoxha, morën pjesë sot në prezantimin e anketimit për matjen e perceptimit qytetar mbi nivelin e sigurisë në vend dhe besimit te Policia e Shtetit.
Rama theksoi se siguria nuk është përgjegjësi vetëm e policisë, por një çështje që kërkon bashkëpunim mes institucioneve, përfshirë bashkitë, shëndetësinë dhe vetë qytetarët.
Duke iu referuar të dhënave të anketimit, kryeministri u shpreh se Shqipëria është shumë pranë mesatares së BE-së sa i përket nivelit të sigurisë. Ai theksoi se faktet dhe shifrat tregojnë një ulje të vazhdueshme të kriminalitetit dhe se viti 2024 u mbyll me më pak vrasje.
“Kurrë më shumë se sot Shqipëria nuk ka qenë më e mobilizuar për të arritur nivelin e barazisë para ligjit. Çelja e negociatave me BE nuk është një dhuratë apo vendimmarrje politike, por një konstatim i progresit të bërë në këtë drejtim,” tha Rama.
Anketimi, i financuar nga qeveria suedeze dhe i zhvilluar për herë të gjashtë, tregon se 65% e qytetarëve vlerësojnë punën e Policisë së Shtetit, 75% mendojnë se respektohen prej saj, ndërsa 82% ndihen më të sigurtë.
Ministri i Brendshëm, Ervin Hoxha, nënvizoi rëndësinë e këtij vlerësimi, duke theksuar se besimi i qytetarëve tek institucionet e sigurisë është një tregues pozitiv për përmirësimin e rendit dhe qetësisë në vend.
Por pavarësisht këtij trendi pozitiv të raportuar nga qeveria, gjatë vitit 2024 u regjistruan 41 vrasje, të cilat ishin të karaktereve të ndryshme. Shumë prej tyre kishin bazë sociale dhe nuk ishin të lidhura me krimin e organizuar, por tronditën thellë opinionin publik. Konflikte familjare, sherre banale dhe vrasje për motive të dobëta mbetën një problem shqetësues për sigurinë në vend.
