Reporter.al i kushton rëndësi Lëvizjes Bashkë, por problemi prek gjithë opozitën
Portali Reporter.al ka trajtuar sot në detaje një fushatë dezinformimi në rrjetet sociale kundër Lëvizjes Bashkë dhe kreut të saj, Arlind Qori.
Reporter. al shkruan se një faqe anonime në Instagram, “Gënjejmë Bashkë”, është përfshirë në një fushatë negative kundër Lëvizjes Bashkë, duke shpërndarë informacion të pabazuar në fakte nëpërmjet postimeve dhe reklamave të padeklaruara si komunikim politik. Kjo faqe ka ndryshuar të paktën një herë emrin dhe ka përdorur reklama të cilat Meta i ka fshirë për shkelje të rregullave mbi transparencën. Lëvizja Bashkë e sheh këtë sulm si të nxitur nga kundërshtarët politikë apo oligarkët ekonomikë. Kjo nuk është hera e parë që faqe anonime përdoren në rrjetet sociale për të shpërndarë dezinformim gjatë fushatave zgjedhore në Shqipëri.
Megjithatë, sfidat me të cilat përballet Lëvizja Bashkë nuk janë unike për këtë parti. Fenomeni i sulmeve anonime dhe fushatave të orkestruara në rrjete sociale është i zakonshëm për opozitën në tërësi. Ndaj, edhe pse Qori mund të jetë aktualisht në shënjestër, ai nuk duhet trajtuar si i vetmi i përndjekur, ndërsa forca të tjera opozitare hasin probleme të ngjashme.
