Tre muaj na ndajnë zyrtarisht nga nisja e fushatës zgjedhore dhe media ka pjesën e "luanit", sigurisht që media publike vlen akoma më shumë. Ky institucion i mbajtur në këmbë nga taksat e qytetarëve të Shqipërisë prej muajsh drejtohet nga drejtore e komanduar, znj. Aurora Polo. Vetëm pak ditë më parë, Këshilli Drejtues i RTSH-së hapi garën, nga 10 kandidatë, 8 u skualifikuan dhe vetëm 2 kaluan në fazën finale. Këshilli Drejtues i RTSH-së vendosi që në fazën e dëgjesës të thirren kandidatët Jetmir Shpuza dhe Aurora Polo. Kjo mesa duket nuk i ka pëlqyer as PS-së dhe as PD-së. Kryetarja e Komisionit Parlamentar të Medias, deputetja demokrate Ina Zhupa si dhe deputetja Evis Kushi kanë qenë në të njejtën linjë sa i takon qëndrimeve mbi këtë proces duke cilësuar me disa shkelje ligjore dhe parregullsi. Në një zë, të dyja forcat kryesore politike thirrën sot në një seancë dëgjimore në Komisionin e Medias në Kuvend anëtarët e Këshillit Drejtues të Radio Televizionit Shqiptar. Fokusi i diskutimit ishin procedurat për përzgjedhjen e kandidatëve për drejtor të RTSH-së. Të pranishëm në seancë dëgjimore ishte kryetari i këshillit drejtues Leka Bungo, nënkryetar Gëzim Podgorica dhe anëtarët Genci Përmeti, Ilir Keko, Ardita Reçi, Milena Selimi, Ëngjëll Ndocaj, Edmond Tullumani dhe Albert Minga, teksa mungonin Mevlan Shanaj dhe Dionis Papadhimitri. Anëtarët e këtij Këshilli deklaruan se nuk janë ekspertë ligjorë dhe nuk mbajnë përgjegjësi. Madje, kreu i Këshillit Drejtues të RTSH-së Leka Bungo është shprehur i indinjuar për mos "njohjen" e autoritetit të tij nga drejtori i Përgjithshëm i RTSH-së, duke cilësuar veten si "mbajtësi i çelësave të kashtës". Por se si ka shkuar gara për drejtuesin e ri të RTSH-së, e demaskon anëtarja në Këshillin Drejtues të Radio Televizionit Shqiptar Ardita Reçi e cila pohoi se Këshilli nuk ka shqyrtuar asnjë nga kandidaturat sa i përket përmbajtjes që kanë pasur dosjet e tyre, por thjesht kanë vlerësuar mungesën e dokumentacioneve apo plotësimit të saj. Pra, anëtarët e Këshillit Drejtues të RTSH, të menduar ndër të tjera edhe për të përzgjedhur drejtuesin/drejtuesen e re të medias publike në vend nuk njohin ligjet mbi të cilën funksionojë. Atëherë natyrshëm lind pyetja: Mbi çfarë baze zgjidhet drejtuesi i Radio Televizionit Publik Shqiptar kur Këshilli Drejtues RTSH-së nuk njeh ligjin dhe politika drejton fijet?
