Protesta ka nisur në disa zona të Tiranës, ku nxënësit e gjimnazit “Partizani” dhe studentët e Mjekësisë kanë bojkotuar mësimin për t’iu bashkuar revoltës qytetare.
Gjimnazistët e “Partizanit” kanë dalë në rrugë, duke bllokuar qarkullimin dhe duke bërë thirrje për dorëheqjen e kryeministrit Edi Rama. Gjatë protestës, disa prej tyre u kanë vënë zjarrin kazanëve të mbeturinave.
Protestuesit kanë kaluar pranë zonës së njohur si “Medreseja” dhe më pas janë drejtuar drejt qendrës së Tiranës. Ndërkohë, bojkotit të mësimit i janë bashkuar edhe studentët e Mjekësisë.
Mobilizimi i të rinjve vjen një ditë pas protestës përpara Ministrisë së Arsimit, e cila zgjati për disa orë dhe u shoqërua me tensione, përplasje dhe dhunë.
Pas protestës së djeshme, policia ka arrestuar 16 persona dhe ka proceduar penalisht 49 të tjerë.
