Batuta e Ramës gjatë Samitit në Abu Dhabi duket se nuk është pëlqyer nga kryeministri i Greqisë, Kyriakos Mitsotakis. Në një intervistë televizive mëngjesin e sotëm, Mitsotakis e përshkroi Ramën si një politikan të cilit shpesh i shpëtojnë gjëra që nuk duhej t’i thoshte.
“E njoh zotërinë Rama prej shumë vitesh. Ai ka një mënyrë të veçantë të shprehuri dhe shpesh i shpëtojnë gjëra që nuk duhej t’i thoshte. Këtë herë tha një fjalë të rëndë dhe e kuptoi gabimin e tij. Unë po mbaj parasysh korrigjimin që bëri; ishte një deklaratë e papërshtatshme dhe më mirë ta lëmë pas”, u shpreh Mitsotakis.
Deklaratat e kryeministrit grek vijnë pas kritikave të forta që Rama mori nga mediat greke, pas batutës së tij ndaj gazetarit greko-amerikan John Defterios, ku i tha se “grekët mendojnë se janë pasardhës të Platonit dhe Aristotelit, por nuk janë”.
Një ditë më parë, vetë Rama e korigjoi atë që kishte thënë, duke sqaruar se tonet e tij nuk kanë qenë aspak tendencioze, por vetëm humor miqësor. Ai u shpreh i habitur nga mënyra se si një fjali e thënë me humor miqësor u shkëput nga konteksti dhe si një diskutim informal u shndërrua në një debat publik me “pathos nacionalist”, një fenomen që, sipas kryeministrit, ndodh shpesh në Athinën mediatike.
Kreu i qeverisë gjithashtu theksoi se nuk ka asnjë dyshim mbi rolin e Greqisë së Lashtë dhe figurave të saj në historinë e qytetërimit europian, duke shtuar se Platoni dhe Aristoteli janë filozofë grekë dhe kultura greke meriton vetëm admirim dhe respekt.
