Presidenti amerikan Donald Trump pritet të largojë Richard Grenell nga posti i drejtuesit të John F. Kennedy Center for the Performing Arts, sipas tre burimeve të cituara nga CNN.
Vendimi vjen në një moment kur institucioni i njohur i artit dhe kulturës në Uashington, i cili tashmë mban edhe emrin e Trump në fasadë, pritet të mbyllet për dy vjet për rikonstruksion, ndërsa presidenti synon ta riformësojë sipas vizionit të tij.
Sipas burimeve, njoftimi për largimin e Grenell mund të bëhet edhe gjatë ditës së sotme.
Grenell ka shërbyer si president i përkohshëm i Kennedy Center që nga shkurti i vitit 2025, por drejtimi i tij është shoqëruar me polemika, anulime të shfaqjeve të njohura, protesta, rënie të shitjes së biletave dhe vështirësi financiare.
Edhe pse ai ka qenë një nga bashkëpunëtorët më besnikë të Trump dhe ka mbajtur role të ndryshme gjatë dy mandateve të tij presidenciale, burimet thonë se presidenti është bërë gjithnjë e më i pakënaqur nga titujt negativë në media lidhur me mënyrën se si po drejtohej institucioni.
Një burim pranë Shtëpisë së Bardhë tha se Trump e vlerësonte Grenell, por mendonte se ai kishte dështuar në mënyrën se si menaxhoi drejtimin dhe komunikimin publik të Kennedy Center.
Megjithatë, një zyrtar i administratës këmbënguli se Grenell nuk po shkarkohet, por se ishte parashikuar që ai të ndihmonte vetëm gjatë periudhës së tranzicionit të institucionit dhe më pas të largohej.
Drejtimi i tij është kritikuar nga disa punonjës dhe figura të botës së artit, të cilët thonë se ai nuk kishte përvojë në këtë fushë dhe se ndryshimet e tij kanë krijuar tension dhe dëmtuar institucionin. Nga ana tjetër, mbështetësit e tij argumentojnë se Grenell ishte personi i duhur për të zbatuar vizionin e Trump dhe për të sjellë një qasje më të drejtpërdrejtë në drejtimin e qendrës kulturore.
Sipas burimeve, largimi i tij mund të paraqitet si një tranzicion, ndërsa Kennedy Center po hyn në fazën e ndërtimit dhe rinovimit të planifikuar.
