Një incident i pazakontë ka ndodhur gjatë konferencës për shtyp të kryeministrit Edi Rama, ku pas një debati me gazetaren Ambrozia Meta situata është përshkallëzuar jo vetëm në sallën e konferencës, por edhe në korridoret e Kryeministrisë.
Debati mes kryeministrit dhe gazetares Meta u transmetua live në televizione, por sipas vetë gazetares, tensioni vijoi edhe pasi konferenca u ndërpre.
Në një intervistë pas incidentit, Meta tregoi se kryeministri i kërkoi të largohej nga konferenca dhe se përplasja vazhdoi në korridor.
“Në momentin që ka ndërprerë konferencën, ka dalë dhe më ka thënë që duhet të dalësh jashtë nga konferenca. Në momentin që unë kam shkuar për të dalë jashtë, për të mos e agravuar më shumë situatën, ka qenë një punonjës i Gardës që nuk donte të më lejonte të dilja, sepse në ato momente Rama ishte duke kaluar në korridor. Dhe unë i kam kërkuar ta hap derën sepse për sa kohë që më kërkoi daljen nga konferenca, unë doja të largohesha. Në këto momente jemi përballë sërish në korridor, ku kryeministri më ka thënë që je e përjashtuar përgjithmonë nga konferencat. Pra më ka nxjerrë jashtë. Pra kam marrë karton të kuq në Kryeministri, nuk mund të hyj më në konferencat e tij”, deklaroi gazetarja.
Sipas saj, kjo nuk është hera e parë që kryeministri përjashton gazetarë nga aktivitetet e tij me median.
Situata është përshkallëzuar edhe më tej kur në korridor ndodhej edhe gazetari Isa Myzyraj. Duke parë praninë e tij pranë Ambrozia Metës, Rama ka reaguar duke e nxjerrë jashtë edhe atë nga konferenca, ndonëse Myzyraj nuk kishte bërë ende asnjë pyetje gjatë aktivitetit.
Ngjarja ka shkaktuar reagim edhe nga Asociacioni i Gazetarëve të Shqipërisë (AGSH).
Në një deklaratë publike, AGSH dënoi përjashtimin e gazetares Ambrozia Meta nga konferencat për shtyp të kryeministrit, duke e cilësuar këtë një precedent të rrezikshëm për lirinë e medias dhe aksesin në informacion publik.
“Asociacioni i Gazetarëve të Shqipërisë dënon përjashtimin përgjithmonë të gazetares Ambrozia Meta nga konferenca për shtyp, një veprim që përbën një precedent të rrezikshëm për kufizimin e aksesit të gazetarëve në informacion publik dhe përjashtimin selektiv të mediave nga aktivitetet institucionale”, thuhet në reagim.
Organizata thekson se institucionet publike kanë detyrimin të garantojnë akses të barabartë për të gjithë gazetarët dhe se përjashtimi selektiv cenon standardet demokratike dhe transparencën institucionale.
