Tensionet në Lindjen e Mesme vijojnë të rriten, ndërsa Shtetet e Bashkuara kanë dërguar rreth 2,200 ushtarë shtesë në rajon si pjesë e operacioneve kundër Iranit. Sipas raportimeve, në operacion janë përfshirë edhe disa anije luftarake të shoqëruara nga rreth 20 avionë luftarakë. Grupi i sulmit pritet të përfshihet në një operacion për të marrë nën kontroll ishullin iranian Kharg në Gjirin Persik, një pikë strategjike nga e cila realizohet rreth 80% e eksporteve të naftës së Iranit.
Ky zhvillim vjen në ditën e 14-të të konfliktit në Lindjen e Mesme, ku Shtetet e Bashkuara dhe Izraeli janë rreshtuar si aleatë kundër Iranit. Ndërkohë, forcat mbrojtëse të NATO-s kanë neutralizuar një tjetër raketë balistike që hyri në hapësirën ajrore të Turqisë, duke e çuar në tre numrin e raketave të kapura që nga fillimi i konfliktit.
Po ashtu, në Teheran është raportuar për një shpërthim të fuqishëm në një shesh ku tradicionalisht zhvillohet manifestimi i “Ditës së Kudsit”, një demonstratë vjetore në mbështetje të çështjes palestineze.
