Kryeministri Edi Rama duket se ka hapur një tjetër front përplasjeje me gazetarët, këtë herë jo brenda kufijve të Shqipërisë, por jashtë saj, e konkretisht me mediat greke. Shkak është bërë një deklaratë e tij gjatë Samitit ku mori pjesë në Abu Dhabi, ku Rama u shpreh se “grekët mendojnë se janë pasardhës të Platonit dhe Aristotelit, por nuk janë”.
Megjithatë, humori për vëmendje dhe pak i tepruar i kryeministrit, duket se ka ngjallur reagime në disa media greke, si dhe nga përfaqësues të politikës në Athinë, duke e detyruar Ramën që sot të shpjegojë se çfarë ka dashur të thotë.
Rama shprehet se është i habitur nga mënyra se si një fjali e thënë, sipas tij, me humor miqësor është shkëputur nga konteksti dhe se si një diskutim informal është shndërruar në një debat publik me “pathos nacionalist”, një fenomen që, sipas kryeministrit, ndodh shpesh në Athinën mediatike.
Kreu i qeverisë siguron se nuk ka asnjë dyshim mbi rolin e Greqisë së Lashtë dhe figurave të saj në historinë e qytetërimit europian. Ai thekson se Platoni dhe Aristoteli janë filozofë grekë dhe se kultura greke meriton vetëm admirim dhe respekt.
Megjithatë, kjo nuk është hera e parë që protagonizmi i tepërt i kryeministrit në takime ndërkombëtare i kthehet në bumerang.
Kujtojmë se edhe gjatë Samitit të Komunitetit Politik Europian, ku Rama, në prani të presidentit të Francës dhe presidentit të Azerbajxhanit, po me “humor”, përdori gafën e presidentit të SHBA-së, i cili kishte ngatërruar Armeninë me Shqipërinë. Pasi videoja bëri xhiron e mediave ndërkombëtare, Rama u detyrua sërish të dalë për të shpjeguar se bëhej fjalë për një shaka.
Ndërsa përgjegjësinë për nxjerrjen nga konteksti ia la, edhe atëherë mediave, që në fakt shpërndajnë ato që nxjerr nga goja kryeministri edhe në takime ndërkombëtare ku serioziteti nuk përzihet me batuta të lodhura.
