Deputeti socialist Petro Koçi ka bërë të ditur se nuk do të jetë pjesë e listës së kandidatëve për deputet në zgjedhjet e 11 majit. Në një mesazh drejtuar kolegëve të tij socialistë, ai shprehet se vendimi nuk vjen si pasojë e ndonjë frike politike apo braktisjeje të solidaritetit, por sepse nuk ka pasur mundësinë të nisë garën në kushte të barabarta, pasi nuk i është caktuar një zonë përgjegjësie elektorale.
Koçi thekson se do të vijojë të kontribuojë për fitoren e Partisë Socialiste dhe vlerëson punën e Blendi Gonxhes në zonën e Kombinatit, duke e konsideruar zgjedhjen e tij si të duhur për shkak të sfidave madhore që lidhen me rindërtimin dhe projektet infrastrukturore.
Ai flet edhe për spostimin e tij nga aktiviteti organizativ i partisë, duke e cilësuar si një proces jotransparent dhe duke theksuar se nuk është informuar për takimet dhe mbledhjet në nivel lokal.
Në mesazhin e tij, Koçi i bën thirrje çdo kolegu socialist që ka probleme serioze me SPAK të mos kandidojë në zgjedhjet e ardhshme, duke theksuar rëndësinë e ruajtjes së integritetit të Partisë Socialiste në raport me drejtësinë.
