Ministri i Brendshëm i Italisë, Matteo Piantedosi, ka bërë të ditur riatdhesimin e parë të një emigranti nga kampi i Gjadrit në Shqipëri, në kuadër të marrëveshjes për emigrantët e dëbuar nga Italia. Emigranti, një 42-vjeçar nga Bangladeshi, ishte vendosur në kamp vetëm pak ditë më parë dhe është kthyer në vendin e tij të origjinës.
Në një postim në rrjetin social “X”, Piantedosi tha se operacionet e riatdhesimit do të vijojnë edhe në ditët në vijim, si pjesë e strategjisë së qeverisë italiane për të përballuar në mënyrë më efektive imigracionin e paligjshëm.
Sipas agjencisë italiane të lajmeve “ANSA”, personi i riatdhesuar kishte mbërritur në Itali që në vitin 2009 dhe ishte dënuar më parë për disa vepra penale, përfshirë një rast të rëndë të dhunës në familje. Ai u konsiderua rrezik social dhe ndaj tij u lëshua urdhri i dëbimit.
Riatdhesimi vjen pas një vale trazirash në kampin e Gjadrit, ku janë vendosur 40 emigrantë nga Italia. Protestat e dhunshme nga gjysma e tyre çuan në dëmtime të mëdha të mobilieve dhe infrastrukturës së qendrës. Xhama të thyer, shtëpi të plaçkitura dhe dyshekë të shkatërruar ishin pamjet që pasuan përplasjet.
Pas hetimeve, 10 prej emigrantëve u izoluan në qelitë speciale brenda kampit dhe do të lejohen të takohen vetëm me avokatët e tyre. Tre të tjerë u vetëlënduan me thikë, por fatmirësisht janë jashtë rrezikut për jetën.
Në kampin e Gjadrit janë strehuar kryesisht shtetas nga Tunizia dhe Maroku, por edhe nga vende si Bangladeshi dhe Moldavia. Të gjithë janë shoqëruar të prangosur nga autoritetet italiane. Sipas mediave italiane, 60% e tyre janë dënuar për tentativë vrasje, pesë për dhunë seksuale dhe të tjerë për vepra të rënda penale si trafik droge, joshje të të miturve dhe krime kundër personit apo pronës. Shumë prej tyre kanë përdorur identitete të rreme për të shmangur ndëshkimin.
Qeveria italiane ka theksuar se procesi i dëbimeve do të vijojë me intensitet, në përputhje me marrëveshjen me Shqipërinë dhe prioritetin për sigurinë kombëtare.
