Çdo 16 prill, shumë qytetarë të Kosovës rikthehen në Kukës për të përkujtuar eksodin biblik të vitit 1999. Kjo ditë është kthyer në një moment reflektimi e falënderimi për popullin kuksian, që në kulmin e luftës priti me zemër të hapur mijëra shqiptarë të dëbuar nga Kosova.
Në marsin dhe prillin e vitit 1999, ushtria serbe ndërmori një valë të gjerë spastrimi etnik ndaj shqiptarëve në Kosovë, duke i dëbuar me dhunë nga shtëpitë e tyre. Kukësi u kthye në shtëpinë e dytë për rreth 800 mijë refugjatë, të strehuar në banesa, godina publike dhe kampet e ngritura enkas për ta.
Përpjekjet për strehimin dhe kujdesin ndaj të shpërngulurve vazhduan deri më 13 qershor 1999, kur Kosova u çlirua me ndërhyrjen e NATO-s dhe përpjekjet e Ushtrisë Çlirimtare të Kosovës.
Sot, obelisku i ndërtuar në Kukës mbetet simbol i mikpritjes, sakrificës dhe solidaritetit të jashtëzakonshëm që shpëtoi jetë dhe ruajti dinjitetin e një populli të tërë.
