Edi Rama i është kthyer sot prapë narrativës së sulmeve ndaj SPAK, këtë herë duke shprehur pakënaqësinë për masat e marra nga prokurorët e posaçëm në Universitetin Bujqësor të Tiranës.
“Masë sigurie PA GJYQ për stafin dhe pedagogët e universitetit për disa procedura të disa viteve më parë në shumën totale më pak se 30 milionë lekë”, tha sot kryeministri, i cili në fakt është munduar ta relativizojë edhe masën, edhe shumën e parave të korrupsionit. Edi Rama e ka të qartë se ndalimet janë bërë (si dhe në rastet e ish-ministrave dhe kryetarit të bashkisë) me vendim gjykate dhe se shifra e abuzimit është rreth 900 mijë euro, jo aq sa pretendon Rama.
Përkundrejt kësaj narrative relativizuese për skandalin e radhës, kryeministri sërish ka harruar se fondet e universiteteve shqiptare nuk janë sa të inceneratorëve dhe 900 mijë euro janë një shumë e madhe krahasimisht me financimet e tyre. Për më tepër, duke e shpallur veten gjykatës dhe deputetët e PS si jurinë e një gjyqi popullor, Edi Rama ka ftuar nesër rektorin e Universitetit Bujqësor të shfajësohet në mbledhjen e grupit parlamentar të drejtuar prej tij. Jo krejt rastësisht kjo është hera e dytë që kryeministri përpiqet të “shplajë” persona të implikuar në dosjet që po heton SPAK. Pak ditë më parë ishte Klotilda Bushka e cila gati e mallëngjyer lexoi një autokritikë ku nuk kishte asnjë fjalë për akuzën direkte që rëndon mbi të, por një retorikë e pastër sulmi ndaj SPAK. Të njëjtën linjë Edi Rama duket se po ndjekë dhe me rektorin e UB Fatbardh Sallaku i cili në një shkelje flagrante të autonomisë së universiteteve do dalë për të dhënë shpjegime për një çështje që është në hetim. Duke rrezikuar shkeljen e sekretit hetimor, autonominë e institucionit që përfaqëson dhe mbi të gjitha, duke u shfaqur si vasal i kryeministrit me shpresën se ky i fundit do t’i dalë për zot.
E ngjashme me mbledhjet e Byrosë së KQ-së së diktaturës, personazhet groteskë afër diktatorit nuk kanë ndonjë ndryshim të madh nga ata që do jenë në krah të Edi Ramës. Mbushur me Pali Miska dhe Lenka Çuko, grupi parlamentar i PS është tashmë një mishërim i injorancës, paaftësisë dhe zhgërryerjes në batakun e një qeverisje që po kalon ditët e saj më të vështira.
Tashmë, dy goditjet e fundit të prokurorisë së posaçme e kanë gjetur Edi Ramën “pa tekst” dhe pa skenar për të ndërtuar strategjinë e komunikimit në momentet kur dhe zgjedhjet janë shumë afër. Spontaniteti nuk po e ndihmon dhe mesa duket, papërgatitja është duke i dhënë kosto të madhe politike dhe elektorale. Ndoshta në strategjinë e tij të re, beteja me SPAK mund të zërë një vend të rëndësishëm, por për të ndërtuar narrativën anti-SPAK në më pak se 80 ditë fushatë elektorale nuk ka më kohë fizike. Ndaj çorganizimi duket të jetë ulur këmbëkryq në kampin socialist, duke i lënë terren të lirë PD dhe opozitës, që për fat të keq nuk po dinë (apo nuk duan) ta shfrytëzojnë hapësirën, duke mbetur peng i halleve personale dhe i çorganizimit të organizuar që i shoqëron në çdo fushatë elektorale.
