Nga Desada Metaj
Jorida Tabaku ka marrë sot qëndrim të qartë për reformën në drejtësi dhe nevojën që ka ajo, sipas saj, për t’u përmirësuar. “Është e nevojshme që Komisioni i Venecias të japë një opinion të plotë për zbatimin e kësaj reforme, situatën, por edhe infrastrukturën e sistemit,” tha sot kryetarja e Komisionit Parlamentar të Integrimit, duke vendosur zyrtarisht gurin e parë në murin që Fatmir Xhafaj ka kohë që po ngre për të kontrolluar reformën në drejtësi (lexo: SPAK).
Zonja Tabaku, në cilësinë e drejtueses më të lartë parlamentare për integrimin, duket se këtë herë petkun e deputetes e ka lënë mënjanë për t’i bërë “fresk” kryetarit të partisë. Sali Berisha prej kohësh artikulon fjalorin më të ashpër ndaj SPAK dhe reformës në drejtësi, duke premtuar që pas ardhjes në pushtet do t’i drejtohet Komisionit të Venecias për këtë. Dhe mesa duket, këtë herë, veç pjesës mbështetëse tradicionale të çdo gjëje që thotë “doktori”, edhe zonja Tabaku po tregohet e zellshme për të ndryshuar reformën në drejtësi.
Që Jorida Tabaku, pas një periudhe të gjatë letargjie dhe paqartësie në pozicionimin e saj “pro apo kundër drejtësisë”, “pro apo kundër ndërkombëtarëve”, “pro apo kundër ‘non grata’-s”, tashmë është linjëzuar qartësisht me Berishën dhe kundër drejtësisë, kjo nuk përbën më kuriozitet. Ajo që e rëndon më shumë situatën është fakti se kryetarja e Komisionit të Integrimit jep edhe “zgjidhjen” për një ndërhyrje “korrigjuese” në reformën në drejtësi. Po sot, edhe komisioni i drejtuar nga Fatmir Xhafaj ka qenë thuajse në sinkron me deklaratën e zonjës Tabaku. “Ekspertët” e Xhafajt madje kanë ngritur zërin se dikush duhet të “kontrollojë” SPAK-un, sepse kjo është e patolerueshme.
Në komisionin e drejtuar nga Fatmir Xhafaj sot ka pasur dhe një propozim interesant: krijimi i një komisioni të përhershëm parlamentar për antikorrupsionin dhe integritetin, i cili do të ketë jo vetëm rolin e monitorimit të zbatimit të reformës, por edhe të mbikëqyrjes dhe monitorimit të institucioneve, çka do të ndihmonte koordinimin më të mirë mes institucioneve të ndryshme që kanë funksion parandalimin e korrupsionit.
Ndoshta Jorida Tabaku dhe Fatmir Xhafaj nuk i kanë koordinuar qëndrimet e tyre paraprakisht. Por mesa duket, mendimet dhe qëndrimet e tyre për reformën në drejtësi dhe ecurinë e saj janë kaq të ngjashme, sa nuk do të jetë e largët dita kur komisioni antikorrupsion i Xhafajt dhe ai i integrimit i Tabakut të bashkohen për një qëllim të përbashkët. Edhe pse Jorida Tabakut do t’i duhet si fillim një vend i sigurt në listën e Sali Berishës – gjë që, me qëndrimin e sotëm, duket pak, por e sigurt.
