Gjatë një interpelance me ministren e Arsimit dhe Sportit, deputetja demokrate Ina Zhupa e cilësoi atë si “hajdute”. Ky koment u prit me kundërshtime nga kryetarja e Kuvendit, Elisa Spiropali, e cila apeloi që të mos përdorej fjalor fyes në sallën e Kuvendit.
Deklarata e Spiropalit nxiti reagimin e deputetit demokrat Flamur Noka, i cili e cilësoi fjalën “hajdut” si “gjysma e së vërtetës” për mazhorancën.
Debati në sallë:
Noka: “T’ju thuash juve hajdut nuk është fyerje, është gjysma e së vërtetës. Nëse deputetja akuzon për abuzime apo vjedhje në arsim e shëndetësi, kjo nuk do të thotë shkelje e etikës. Edhe kryeministri vetë ka thyer etikën.”
Spiropali: “Mos ngatërroni telashet tuaja të brendshme me tonat. Mbylleni mikrofonin, kjo nuk është procedurë. Do t’ju hiqet e drejta e fjalës për fyerje. Uluni në vend, nuk e keni fjalën.”
Kryetarja e Kuvendit paralajmëroi Nokën për fyerjet dhe i ndërpreu të drejtën për të vazhduar. Tensionet mes palëve vijojnë të mbeten të larta në sallën e Kuvendit.
“Nuk mund të mos dënoj ashpërsinë me të cilën kryetarja e Kuvendit ndërpret fjalën e deputetes, vetëm sepse ajo përdor një epitet që e ndan me gjithë shqiptarët,” deklaroi ish-kryeministri Sali Berisha.
Ai shtoi se mazhoranca nuk mund të shpëtojë nga akuzat dhe se gjyqi publik ndaj tyre për abuzime dhe vjedhje do të vazhdojë për sa kohë ekzistojnë prova konkrete.
