Agron Shehaj ka hedhur akuza ndaj partive të reja që mes tyre ka projekte të kryeministrit Rama për të manipuluar garën politike. Në intervistën me Eni Vasilin, Shehaj vuri theksin te burimet financiare të këtyre partive, duke ngritur dyshime për transparencën dhe mënyrën se si mbulojnë shpenzimet e larta.
“Si mund të bëhen fushata dhe aktivitete politike që kushtojnë miliona euro pa bërë publike burimet e financimit?” – tha Shehaj. Ai solli shembullin e shpenzimeve që kërkon një takim i zakonshëm në Shqipëri: “Në një takim në Durrës kemi harxhuar më shumë se 10 mijë euro për organizimin. Imagjinoni kur bëhen 100 takime kudo në Shqipëri, jo më jashtë vendit. Janë miliona euro shpenzime. Kush po i financon këto?”
Shehaj nënkuptoi se Adriatik Lapaj, i cili është i vetmi i cili ka organizuar takime edhe jashtë vendit, mund të jetë ndër ata që sponsorizohen nga qeveria: “Unë i ftoj qytetarët të përdorin logjikën dhe të mos bien pre e projekteve të qeverisë që kanë futur dorën në garën e partive të reja. Gara nuk është e drejtë kur në të ndërhyn ai që ka pushtetin absolut.”
Ndonëse nuk e përmendi drejtpërdrejt emrin e Lapajt, referencat e tij për shpenzimet e larta dhe aktivitetet ndërkombëtare nxitën dyshime se sulmi i tij ishte i drejtpërdrejtë ndaj këtij subjekti politik.
