Kryeministri Edi Rama ka përsëritur sërish sot qëndrimin se pa vullnetin e PS, SHBA dhe BE nuk do të kishin bërë dot të mundur reformën në drejtësi. Kjo deklaratë, e cila është përsëritur shpesh kohët e fundit nga kryeministri, sot Rama u kujdes ta thoshte në takimin e nivelit të lartë me praninë e ambasadorëve të akredituar në Shqipëri.
“PS forca që qeveris vendin prej 2013 është forca udhëheqëse e reformës në drejtësi. Pa këtë forcë udhëheqëse dhe pa vullnetin e PS jo Amerika, jo Evropa, por të gjithë të tjerët të bëheshin bashkë nuk do ta kishin bërë të mundur reformën në drejtësi. Pa mbështetjen e aleatëve strategjikë kjo reformë do të kishte rrugë tjetër dhe do të ishte e pamundur,” – u shpreh Rama.
Duke u kapur pas akuzave të opozitës, kryeministri foli në sy të ambasadorëve edhe për komisionin Xhafaj.
“Ambicia jonë është që ta anëtarësojmë Shqipërinë në BE brenda kësaj dekade, shtuar edhe plani i dakordësuar shumë agresiv së bashku me Komisionin Evropian që Shqipëria të përfundojë detyrat brenda 2027, na e bëjnë të pamundur të jetojmë qetësisht me skepticizmat, dhe lërë pastaj me akuzat apo edhe me përpjekjet për ta penguar procesin. Fatmir Xhafaj dhe Edi Rama kanë një plan të errët për të bllokuar SPAK-un, dhe për të kthyer përmbys reformën në drejtësi. Prandaj bëjnë mbledhje sekrete me një grup njerëzish në PS dhe po thurin një komplot. Kur përmend SPAK dhe drejtësinë, ka shumë sensibilitet dhe shumë forca që angazhohen për të dalë në mbrojtje. Konsiderojnë akuzat si hudhra që do të pengojnë syrin e keq,” – tha më tej Rama.
Për një qytetar që dëgjon për herë të parë fjalimet e Ramës, kjo deklaratë është një retorikë e zakonshme e një kryeministri që lavdëron punën e tij. Por e vënë në sfondin e rrjedhës së ngjarjeve, këto mesazhe të Ramës nuk janë të rastësishme.
Sot ndodhemi në një situatë kur drejtësia e re, apo më konkretisht SPAK, ka goditur dhe po godet nivele të larta të qeverisë dhe eksponentë të Partisë Socialiste që po kapen në korrupsion. Në të njëjtën kohë, Rama ka shpikur komisionin anti-korrupsion, por atë nuk e përfillin as institucionet e drejtësisë, as ambasadat kryesore në vend, pasi janë skeptike për qëllimin e tij.
Goditjet e njëpasnjëshme të SPAK dhe mospërfillja e komisionit Xhafaj bënë që kryeministri të dilte pas shumë kohësh në emisionin “Opinion”, nga ku hodhi për herë të parë deklaratën se “reforma në drejtësi është meritë e PS dhe se ndërkombëtarët sollën Noc Rrokun.” Termi banal në përgjigjen e Ramës do të shkaktonte shumë bujë në media, por jo pa qëllim. Sepse, fill pas asaj interviste, duke dashur të marrë spunton e titujve të mediave, Rama e përdori si thirrje edhe në disa takime të tij pasardhëse.
Me gjasë, Rama me deklaratën e tij kërkonte një tërheqje vëmendjeje nga ana e ndërkombëtarëve në drejtim të iniciativës me emrin Komisioni Anti-Korrupsion. Duke mos e arritur me mesazhe nga larg, kryeministri organizoi sot një takim të nivelit të lartë me praninë e ambasadorëve që t’ua përsëriste tashmë në sy, siç edhe e bëri.
Insistimi për ta përsëritur për të disatën herë deklaratën se “PS ka bërë reformën në drejtësi dhe jo SHBA dhe BE” të jep përshtypjen se fsheh një siklet të madh për kryeministrin, dhe kjo për disa arsye:
Nëse vërtetë reforma në drejtësi është bërë vetëm nga PS, atëherë pse duhet ta përsërisë kryeministri vazhdimisht, pasi ambasadorët dhe qytetarët kanë sy e veshë për të kuptuar dhe gjykuar kaq gjë? Nëse kërkohet që t’i njihet si meritë Partisë Socialiste nga ana e ndërkombëtarëve, atëherë mjafton që marrëdhëniet mes tyre i kanë të mira dhe jo konfliktuale, ndryshe nga marrëdhënia që kanë për shembull me Partinë Demokratike.
Atëherë këtu ngrihet pyetja: çfarë kërkon kryeministri me këtë deklaratë që po e përsërit kaq shumë?! Mos ndoshta do që mbështetësit realë të drejtësisë së re të frenojnë SPAK-un që po bën kurban bashkëpunëtorët e tij? Këtë nuk duam ta besojmë, por një shprehje popullore thotë se “gjuha shkon ku dhemb dhëmbi.”
