Edi Rama nuk i ka kursyer sot lavdërimet për veten dhe Partinë Socialiste për miratimin dhe zbatimin e reformës në drejtësi. Përpara ambasadorëve të akredituar në Tiranë, kryeministri u përpoq ta kalonte me batutë përpjekjen e komisionit të drejtuar nga Fatmir Xhafaj për të ndryshuar ose për të vënë nën kontroll çfarë është arritur deri tani nga kjo reformë. Madje, numri një i qeverisë nuk harroi të përmendte SPAK-un, institucionin që i ka trokitur në dyert e bashkëpunëtorëve më të afërt, duke thënë:
“Ka njerëz që thonë se Fatmir Xhafaj dhe Edi Rama kanë një plan të errët për të bllokuar SPAK-un dhe për të përmbysur reformën në drejtësi. Prandaj bëjnë mbledhje sekrete me një grup njerëzish në PS dhe po thurin një komplot.”
Në fakt, shumë nga ambasadorët e pranishëm në atë sallë e kanë shprehur publikisht jo vetëm shqetësimin për komisionin Xhafaj dhe mbështetjen e Edi Ramës për këtë komision, por edhe për objektin e punës së tij. Po ashtu, të njëjtët ambasadorë përshëndetën çmimin e marrë nga kreu i Prokurorisë së Posaçme, Altin Dumani, nga Sekretari i Shtetit, Antony Blinken.
Kjo duket se nuk i ka pëlqyer Edi Ramës, i cili sot, në fjalimin e tij, nuk e përmendi fare këtë çmim, ndonëse është vlerësimi më i lartë i dhënë ndonjëherë për një nga institucionet e drejtësisë së re. Ndryshe nga vlerësimi i dhënë për Ardian Dvoranin, të cilin kryeministri e ka përshëndetur publikisht, kësaj here Rama, ndoshta nga shqetësimi se tashmë SPAK ka një “dekoratë” të re mbi supe, nuk e ka parë të arsyeshme ta përmendë.
Qartazi, krerët e lartë të shtetit, që nga presidenti, kryeministri apo kryetarja e parlamentit, nuk e përshëndetën çmimin e dhënë nga Departamenti i Shtetit për shefin e SPAK-ut. Ata duket se ndihen, në rastin më të keq të shqetësuar, ose në rastin më të mirë ziliqarë që një çmim kaq i lartë u jepet një personi që ndoshta mund t’u trokasë në derë jo si koleg, por si prokuror.
Altin Dumani, si përfaqësues i institucioneve shtetërore, e meriton këtë nderim, i cili automatikisht përthehet edhe në respekt për shtetin shqiptar. Por mesa duket, këtë respekt, për presidentin, kryetaren e parlamentit dhe kryeministrin, e meritojnë më shumë sportistët dhe këngëtarët që nderohen me çmime ndërkombëtare.
