Fatmir Hoxha, mësues i shkollës 9-vjeçare në Rrajcë, 55 vjeç, baba i tre fëmijëve, është vënë nën hetim pasi dyshohet për ngacmim ndaj dy nxënëseve të klasës së tetë dhe të nëntë. Denoncimi ka ardhur fillimisht nga kolegët e tij, të cilët kanë vënë re sjellje të papërshtatshme ndaj vajzave 14-vjeçare në ambientet e shkollës, si me fjalë ashtu edhe me prekje.
Pas informacioneve të mbledhura, drejtori i shkollës ka njoftuar menjëherë Policinë e Shtetit dhe ka bërë kallëzimin ndaj mësuesit. Fatmir Hoxha, sapo ka mësuar se ishte nën hetim, ka tentuar të largohet nga vendi, por është ndaluar në aeroportin e Rinasit nga efektivët e policisë.
Burime nga grupi hetimor bëjnë me dije se nxënëset janë marrë në pyetje në prani të psikologut, dhe ndodhen në një gjendje të rënduar psikologjike. Prindërit e vajzave kanë deklaruar se nuk kanë qenë në dijeni të ngjarjes dhe janë shprehur të tronditur nga akuzat ndaj mësuesit.
Vetë 55-vjeçari ka mohuar akuzat gjatë marrjes në pyetje, duke pretenduar se po largohej nga Shqipëria për arsye personale.
Prokuroria e Përrenjasit ka nisur hetimet për zbardhjen dhe dokumentimin e plotë të ngjarjes, ndërsa mësuesi pritet të përballet me masën e sigurisë në ditët në vijim. Rasti ka shkaktuar shqetësim të madh në komunitetin arsimor dhe opinionin publik lokal.
