Gjykata e Posaçme kundër Korrupsionit dhe Krimit të Organizuar ka shpallur vendimin përfundimtar ndaj 8 të pandehurve të përfshirë në aferën e inceneratorit të Tiranës.
Ish-ministri i Mjedisit, Lefter Koka, u dënua përfundimisht me 2 vite burgim dhe me heqjen e së drejtës për të ushtruar funksione publike për 5 vite.
Po ashtu, të pandehurit Bledar Karoli, Erjon Murataj, Taulant Tusha (ish-zyrtar i lartë në Bashkinë e Tiranës) dhe Namik Simixhiu, u dënuan secili me 2 vite burgim, si dhe u ndaluan nga ushtrimi i funksioneve publike për 5 vite.
Valbona Ballgjini u dënua me 2 vite burg, por dënimi iu pezullua dhe ajo u vendos në shërbim prove, ndërkohë që i është ndaluar gjithashtu ushtrimi i funksioneve publike për 5 vite.
Sidita Kopliku u dënua me 1 vit burg, i cili u konvertua në 80 orë punë në interes publik brenda një periudhe prej 6 muajsh. Ajo gjithashtu nuk mund të ushtrojë funksione publike për 5 vite.
Ndërkohë, Jetmir Llapaj u shpall i pafajshëm.
Abuzimet e zbuluara sipas hetimeve të SPAK
Sipas Prokurorisë së Posaçme (SPAK), hetimet zbuluan veprime të kundërligjshme të kryera nga të pandehurit në funksion të detyrës së tyre, në lidhje me propozimin për dhënien e bonusit shoqërisë propozuese “Integrated Energy BV”.
SPAK thekson se:
Anëtarët e Komisionit propozuan dhënien e bonusit pa hartuar raport përmbledhës dhe pa sqaruar kostot e projektit.
Projektvendimi për dhënien e bonusit prej 8% të pikëve totale të garës shoqërisë “Integrated Energy BV” u përgatit dhe u dërgua në Këshillin e Ministrave nga zyrtarët e Ministrisë së Mjedisit: Lefter Koka, Alba Thoma, dhe Bledar Karoli.
Gjithashtu, rezulton se shoqëria “Integrated Energy BV” kishte njohuri paraprake për procedurën dhe ishte pajisur me dokumentacionin e nevojshëm përmes ndihmës së zyrtarëve të Ministrisë, përfshirë:
Lefter Koka (Ish-ministër)
Alba Thoma (Drejtoreshë e Drejtorisë Juridike)
Bledar Karoli (Përgjegjës i Sektorit të Prokurimeve)
Valbona Ballgjini, Pëllumb Abeshi, Erjon Murataj, Sidita Kopliku, Etleva Kondi, Taulant Tusha dhe Namik Simixhiu (anëtarë të Komisionit të Koncesionit)
SPAK bën me dije se dokumentet standarde të koncesionit nuk janë hartuar nga komisioni, por nga punonjës të shoqërisë së Klodian Zotos, “Integrated Technology Services” sh.p.k, dhe janë dërguar më pas në Ministrinë e Mjedisit përmes Alba Thomës dhe Bledar Karolit.
Këta të fundit kanë shërbyer si urë lidhëse ndërmjet Ministrisë dhe kompanisë propozuese, duke ndihmuar në përgatitjen dhe miratimin e procedurës koncesionare pa dokumentacion të plotë dhe pa mbledhje zyrtare të komisionit.
Gjithashtu, është konstatuar se të pandehurit kanë përdorur të dhëna fiktive në studimin e fizibilitetit të paraqitur nga shoqëria propozuese, duke rritur artificialisht tarifën e depozitimit të mbetjeve në 29 euro/ton, pa kryer verifikime.
Persona të tjerë të përfshirë
Në një proces të ndarë gjyqësor, po gjykohet ish-deputeti i Partisë Socialiste Alqi Bllako.
Ndërsa Mirel Mërtiri dhe Klodian Zoto, dy persona të konsideruar si bosët faktikë të inceneratorëve, janë shpallur në kërkim dhe akuzohen për korrupsion dhe pastrim parash.
