Për shkak të gjykimit të shkurtuar, dënimi i propozuar i reduktohet në 3 vite burg. Zarka akuzohet për korrupsion në sistemin e drejtësisë dhe ushtrim të ndikimit të paligjshëm, kryer në bashkëpunim në tre raste të ndryshme.
Ai rezulton i implikuar në dosjen e bujshme "Toyota Auris", e cila lidhet me kontrabandimin e 3.4 milionë eurove nga Belgjika në Portin e Durrësit. Nga përgjimet e realizuara në aplikacionin Sky ECC, Zarka dyshohet se ka ushtruar ndikim te kolegët e tij në Prokurorinë e Tiranës dhe ka marrë para nga avokati Radovan Çela, me qëllim favorizimin e të pandehurve në këtë dosje.
Në të njëjtën dosje është e akuzuar edhe ish-oficerja e policisë gjyqësore, Erjona Daupaj. Ajo dyshohet se ka marrë para nga avokati Radovan Çela dhe biznesmeni Astrit Vladi, në emër dhe për llogari të zyrtarëve të lartë të Prokurorisë së Tiranës. Këta të fundit do të ndikonin në Gjykatën e Tiranës për përfundimin e çështjes në favor të të pandehurve.
Zarka po gjykohet në një proces të ndarë nga të pandehurit e tjerë, ndërkohë që SPAK vijon hetimet për gjyqtarë e prokurorë të tjerë të dyshuar për përfshirje në korrupsion.
