Kryeprokurori i SPAK, Altin Dumani, deklaroi se rritja e kallëzimeve të nisura nga qytetarët tregon besimin gjithnjë e më të madh ndaj punës së institucionit. Sipas tij, krahasuar me një vit më parë, ka pasur një rritje prej 36% të hetimeve të nisura nga denoncimet qytetare, ndërsa vihet re një ulje e kallëzimeve nga Policia e Shtetit.
Në raportimin vjetor para Këshillit të Lartë të Prokurorisë, Dumani tha se aktualisht janë nën hetim 33 zyrtarë të lartë për korrupsion, nga të cilët 19 janë dërguar në gjykatë. Për 10 funksionarë publikë janë dhënë dënime të formës së prerë vetëm gjatë vitit 2024.
Ai theksoi se hetimet kanë treguar që korrupsioni zhvillohet në mënyra gjithnjë e më të sofistikuara dhe se SPAK ka intensifikuar bashkëpunimin me vendet e rajonit si Greqia, Kosova, Maqedonia e Veriut, Mali i Zi dhe po punohet edhe me Serbinë për të rritur kontaktet dhe bashkëpunimin ndërinstitucional.
Fokusi i SPAK ka qenë përmbushja e rekomandimeve të Kuvendit dhe Këshillit të Ministrave. Gjatë vitit 2024, struktura është përforcuar me 20 prokurorë të rinj nga KLP. Dumani theksoi se përkundër sfidave dhe presioneve, puna e institucionit ka vijuar pa ndërprerje, dhe rezultatet janë fryt i punës së ekipit dhe mbështetjes së qytetarëve.
Sipas tij, SPAK ka kaluar nga roli i pritësit të kërkesave nga partnerët ndërkombëtarë, në një rol aktiv dhe ndihmues. Aktualisht, 9.5% e totalit të të burgosurve në vend janë rezultat i hetimeve të SPAK.
Gjatë vitit janë regjistruar 145 çështje me 765 të pandehur, ndërsa për 91 çështje vijon procesi gjyqësor. Në raportin e dorëzuar në Kuvend dhe KLP, theksohet se prokurorët e posaçëm janë përballur me presione nga eksponentë të politikës, krimit të organizuar dhe media të caktuara. Dumani raportoi sot i shoqëruar nga prokurorët Klodian Braho dhe Adnand Xholi.
Kreu i Prokurorisë së Posaçme (SPAK), Altin Dumani, ka evidentuar disa nga problematikat kryesore me të cilat përballet institucioni që ai drejton. Gjatë një deklarate publike, Dumani theksoi se një pjesë e këtyre sfidave janë të trashëguara ndër vite, ndërsa të tjera mbeten ende të paadresuara.
Presioni i jashtëm ndaj institucionit është një nga shqetësimet kryesore të Dumanit. Ai nënvizoi se SPAK është vendosur shpesh në qendër të debateve dhe sulmeve politike, duke ndikuar në punën e pavarur të prokurorëve.
Një tjetër çështje kritike është mungesa e një statusi të qartë ligjor për prokurorët e SPAK pas përfundimit të mandatit. Sipas Dumanit, kjo situatë krijon pasiguri dhe mund të ndikojë në angazhimin e tyre afatgjatë në sistem.
Dumani shtoi se SPAK vuan gjithashtu nga mungesa e këshilltarëve ligjorë, element kyç për ndihmesën në analizimin e çështjeve të ndërlikuara ligjore. Ai theksoi nevojën për krijimin e një njësie analize, që do të shërbejë si mbështetje në hetimet komplekse.
Ndërkohë, numri i ulët i referimeve nga institucionet publike u cilësua gjithashtu si një problem i vazhdueshëm, që ndikon në eficencën e hetimeve.
Në fund, Dumani ngriti shqetësimin për mosekstradimin e shtetasve shqiptarë nga Emiratet e Bashkuara Arabe, një çështje që po bëhet gjithnjë e më shqetësuese për drejtësinë shqiptare, për shkak të shtimit të numrit të personave që kërkohen për ekstradim nga ky shtet.
