Një 38-vjeçar ne Lushnje u arrestua ditën e sotme nën dyshimet për korrupsion aktiv në zgjedhje. Marim Leka premtoi para në këmbim të votës. Policia i sekuestroi Lekës kartën e identitetit të personit që i ishin premtuar paratë. Ky është rasti i parë i arrestimit të një personi për krim zgjedhor që lidhet me Parlamentaret e 11 majit.
38 vjeçari blinte vota në favor të PD. Kishte premtuar 500 mijë lekë të vjetra. Është kallezuar direkt nga qytetari i cili ka thënë qe më ka marrë kartën e identitetit dhe më detyron të votoj PD.
Lushnjë
I premtoi një shtetasi, dhënien e një shume parash, dyshohet për t’i blerë votën në interes të një subjekti politik, vihet në pranga 38-vjeçari.
Sekuestrohet karta e identitetit e shtetasit që i ishin premtuar paratë.
Specialistët për Hetimin e Krimeve të Komisariatit të Policisë Lushnjë arrestuan në flagrancë shtetasin M. L., 38 vjeç, banues në Lushnjë, për veprat penale “Korrupsioni aktiv në zgjedhje" dhe “Marrja dhe përdorimi i paligjshëm i dokumentit të identifikimit”.
Nga hetimet e kryera në bashkëpunim me Prokurorinë e Fierit, dyshohet se shtetasi M. L. i ka marrë një shtetasi, kartën e identitetit, si dhe i ka premtuar dhënien e një shume parash, dyshohet me qëllim blerjen e votës në favor të një subjekti politik, pjesëmarrës në zgjedhjet parlamentare të datës 11.05.2025.
Materialet procedurale i kaluan Prokurorisë kundër Korrupsionit dhe Krimit të Organizuar, për veprime të mëtejshme.
