Gjykata e Posaçme vendosi të pranojë një kërkesë të Fredi Belerit dhe të urdhërojë SPAK-un që të hetojë Olta Xhaçkën, ish-ministre e Mbrojtjes, dhe bashkëshortin e saj, Artan Gaçin, lidhur me një pronë mbi të cilën kompania e ish-deputetit socialist ka fituar statusin e investitorit strategjik. Ky vendim nuk u prit mirë nga SPAK, i cili pretendon se ka kryer të gjitha veprimet hetimore dhe nuk ka gjetur prova për implikimin e çiftit në afera korruptive apo vepra të tjera penale. Për këtë arsye, Prokuroria e Posaçme ushtroi ankim në Apelin e Posaçëm. Shkalla e dytë e gjyqësorit ka caktuar datën 25 prill si ditën kur do të vendoset për fatin e dosjes “Xhaçka-Gaçi”. Më herët, për pronën e përfituar nga Gaçi është dënuar për shpërdorim detyre ish-kryebashkiaku i Himarës, Jorgo Goro. Prona me sipërfaqe afro 11 mijë metra katrorë është konfiskuar nga gjykata, edhe pse mbi të janë ndërtuar vila luksoze.
