Festim Bexhdili, kopshtar në resortin Golden ku u mbajt trupi i pajetë i Jan Prengës dhe prej andej u zhduk pa gjurmë, dëshmoi në procesin ndaj bashkë të pandehurve të tjerë, mes tyre dhe Dritan alias Gramoz Rexhepi, i cili u ekstradua së fundmi nga Turqia.
“Isha duke pastruar pishinën, kur erdhi një Range Rover i bardhë dhe u fut te garazhi. Shkova t’i pyesja. Ishin 4 veta të armatosur. Nuk i njihja. Më kërkuan ujë dhe ua dërgova. Isha i frikësuar. Më thanë ‘ka vdekur njëri’. Më thanë ta kalojmë nga makina në makinë. Isha shumë i trembur, nga armët e tyre edhe se pashë një të vdekur. E kaluam nga Range në një Fiat që e përdornim për furnizimet në kompleks. E zhvendosëm trupin.
Fytyrat i kishin të zbuluara, por nuk i kujtoj. Njëri kishte tatuazhe. Pastaj më kërkuan edhe një kazmë e një lopatë. Nga gjuha mu dukën si nga veriu,” tha Bexhdili.
Sipas tij, më pas aty erdhi Altin Hajri. “Ai i shau dhe ju tha ‘çfarë doni këtu, po na merrni në qafë’. Ju kërkoi të iknin shpejt. Nuk e di çfarë bëri Altini më pas. S’e di për çfarë i deshën kazmën e lopatën. Ua dhashë dhe ata i futën në makinë. Pasi ata ikën, unë shkova në shtëpi në Kavajë”, deklaroi ai.
Jan Prenga u mor peng në Kamzë në 2020 pasi vëllai i tij vodhi një sasi të madhe droge që i përkiste Dritan Rexhepit e Gentian Docit (Funiqit).
Bexhdili u dënua përjetë, por vendimi u prish nga Gjykata e Lartë dhe dosja u kthye për rigjykim. Altin Hajri, pronari i resortit Golden, po gjykohet në një proces të ndarë.
