Ndërsa qytetarët protestojnë prej 20 ditësh dhe kërkojnë dorëheqjen e tij, kryeministri Edi Rama ka thirrur sot një mbledhje të zgjeruar të grupit parlamentar socialist, ku do të marrin pjesë edhe ministrat e kabinetit qeveritar.
Takimi pritet të zhvillohet vetëm një orë më vonë në Pallatin e Brigadave, ndërsa në fokus të diskutimeve do të jenë ecuria e procesit të integrimit europian dhe procedurat e ndjekura deri më tani për investimin në Zvërnec.
Çështja e Zvërnecit pritet të jetë një nga temat kryesore të mbledhjes, për shkak të vëmendjes së madhe publike, protestave të zhvilluara dhe jehonës ndërkombëtare që ka marrë ky projekt në javët e fundit.
Gjatë mbledhjes, kryeministri Rama pritet të mbajë fjalën e tij së bashku me kreun e grupit parlamentar të Partisë Socialiste, Taulant Balla. Ndërkohë, deputetëve u është lënë në dispozicion jo më shumë se dy minuta për diskutime dhe raportime.
Një tjetër çështje që ka shkaktuar debat në kampin socialist është largimi nga grupi parlamentar i deputetes Marjana Koçeku. Deri më tani nuk ka pasur asnjë reagim zyrtar lidhur me këtë zhvillim, as nga kryeministri Rama dhe as nga kreu i grupit parlamentar socialist, Taulant Balla.
