Kryeministri izraelit Benjamin Netanyahu dërgoi një mesazh të qartë se do të shkatërrojë plotësisht grupin Hamas, në deklaratën e tij të parë publike pas njoftimit të Donald Trump për një propozim armëpushimi 60-ditor në Gazë, ndërsa Hamas ka njoftuar se po e shqyrton këtë propozim.
“Hamas nuk do të ekzistojë. Nuk do të ketë ‘Hamashtan’. Nuk do të kthehemi më pas aty. Ka përfunduar. Do të çlirojmë të gjithë pengjet tanë,” theksoi Netanyahu në një event pranë tubacionit Trans-Israel.
Kryeministri Netanyahu iu përgjigj edhe kritikave që vinin lidhur me një dukshme kontradiktë mes dëshirës për shkatërrimin e Hamasit dhe arritjes së një marrëveshjeje për lirimin e pengjeve. “Disa thonë ‘si mund t’i thoni këto? Janë qëllime që kundërshtojnë njëra-tjetrën.’ Çfarë budallallëku! Ato shkojnë së bashku. Ne do t’i realizojmë bashkë, ndryshe nga ato që thonë të tjerët. Do t’i shkatërrojmë plotësisht,” deklaroi ai.
Netanyahu shtoi se Izraeli nuk do të humbasë këtë mundësi historike. “Mundësitë janë të mëdha. Nuk do t’i humbasim. Nuk do të dështojmë. Nuk do të humbasim këtë mundësi,” tha ai.
Gjithashtu, ai theksoi prioritetet strategjike që lidhen me mundjen e armikut dhe forcimin e pozicionit të Izraelit në nivel kombëtar, ekonomik dhe ndërkombëtar, duke vënë theksin në synimin që Izraeli të forcohet më shumë në fushën e energjisë.
Ky qëndrim i Netanyahut vjen pas njoftimit të Donald Trump se Izraeli ka pranuar propozimin e tij për armëpushim 60-ditor, me qëllim përfundimin e luftës. Presidenti amerikan i bëri thirrje edhe Hamasit që të pranojë marrëveshjen. “Shpresoj, për hir të Lindjes së Mesme, që Hamas ta pranojë, sepse nuk do të ketë marrëveshje më të mirë — VETËM MË TË KËQIA,” shkroi ai në Truth Social.
Sipas një zyrtari të lartë izraelit, Ministri i Çështjeve Strategjike, Ron Dermer, informoi të dërguarin amerikan për Lindjen e Mesme, Steve Witkoff, se Izraeli ka pranuar propozimin për armëpushim dhe marrëveshje për shkëmbim pengjesh dhe është i gatshëm të nisë menjëherë bisedimet me Hamas për finalizimin e planit.
