Irani i ka kërkuar Shteteve të Bashkuara që të përjashtojnë çdo mundësi për një tjetër sulm ushtarak nëse duan të rikthehen në tryezën e bisedimeve diplomatike. Në një intervistë për BBC-në, Zëvendësministri i Punëve të Jashtme të Iranit, Majid Takht-Ravanchi, deklaroi se vendi i tij kërkon një garanci të qartë përpara se të rifillojë negociatat me Uashingtonin.
Sipas zyrtarit të lartë iranian, administrata e Presidentit Donald Trump – e cila ka shprehur dëshirën për rifillimin e dialogut përmes kanaleve diplomatike – nuk ka sqaruar ende pozicionin e saj për një çështje që Irani e konsideron themelore: ndërprerjen e çdo lloj sulmi gjatë zhvillimit të bisedimeve.
“Administrata Trump ka përcjellë përmes ndërmjetësve sinjalin se dëshiron të rikthehet në negociata, por nuk e ka bërë të qartë qëndrimin e saj për çështjen shumë të rëndësishme që është vazhdimi i sulmeve gjatë procesit diplomatik,” theksoi Takht-Ravanchi.
Tensionet mes dy vendeve janë përshkallëzuar në mënyrë dramatike që prej fillimit të qershorit, kur Izraeli ndërmori një ofensivë të gjerë ajrore mbi centralet bërthamore dhe infrastrukturën ushtarake iraniane. Në kundërpërgjigje, Irani lëshoi raketa drejt objektivave izraelite. Më 21 qershor, situata u rëndua edhe më tej, kur SHBA-ja ndërhyri drejtpërdrejt duke bombarduar tre centrale bërthamore në Iran.
Operacioni ushtarak i Izraelit, që nisi mëngjesin e 13 qershorit, sipas diplomacisë iraniane dëmtoi në mënyrë të pakthyeshme raundin e gjashtë të bisedimeve jo direkte që ishin planifikuar të mbaheshin në Muscat më 15 qershor.
Zëvendësministri iranian këmbënguli se vendi i tij nuk do të heqë dorë nga pasurimi i uraniumit për qëllime paqësore. Ai përsëriti mohimin e akuzave që Irani po synon në mënyrë të fshehtë ndërtimin e një arme bërthamore.
“Niveli i kësaj përfshirjeje mund të diskutohet, kapaciteti mund të diskutohet. Por të thuash se ‘nuk duhet të keni fare pasurim, duhet ta keni pasurimin zero – përndryshe do t’ju bombardojmë’ – ky është ligj xhungle,” deklaroi Takht-Ravanchi.
Për momentin, perspektiva për rifillimin e dialogut duket e paqartë, ndërsa Irani kërkon garanci të qarta nga Uashingtoni, për të shmangur përsëritjen e skenarëve të dhunshëm gjatë zhvillimit të bisedimeve.
