Me Sudanin e zhytur në kthetrat e një lufte të përgjakshme dhe miliona njerëz që përpiqen të gjejnë diçka për të ngrënë, situata humanitare në vend është kthyer në një tragjedi të përmasave apokaliptike. Mungesa e ushqimit ka detyruar shumë qytetarë të mbijetojnë duke konsumuar barishte të egra, mbetje ushqimore dhe deri edhe qymyr.
Pamjet dhe raportimet nga terreni tregojnë gra, burra e fëmijë që ziejnë bimë të egra në ujë me kripë, sepse thjesht nuk ka asgjë tjetër për të ngrënë. Zëdhënësja e Programit Botëror të Ushqimit për Sudanin tha se njerëzit janë detyruar të hanë lëvozhga kikirikësh, gjethe apo barishte të pazakonta, vetëm për të shmangur vdekjen nga uria.
Në zonat më të goditura si Darfuri i Veriut, disa banorë madje kanë filluar të thithin qymyr për të lehtësuar ndjenjën e urisë. Një punonjës humanitar, në kushte anonimiteti, deklaroi se dhjetëra të moshuar, gra shtatzëna dhe fëmijë kanë vdekur jo vetëm nga uria, por edhe nga mungesa e kujdesit mjekësor bazë.
Sipas të dhënave më të fundit, pas dy vitesh konflikti, rreth 24.6 milionë njerëz në Sudan përballen me pasiguri ekstreme ushqimore, ndërkohë që afro 13 milionë persona janë zhvendosur nga shtëpitë e tyre.
Punonjësit e ndihmës ndërkombëtare theksojnë se lufta ka rritur çmimet e produkteve ushqimore, ka bllokuar ndihmat humanitare dhe ka ndaluar punimin e tokave bujqësore në një vend që dikur njihej si një ndër shportat e bukës së Afrikës.
Konflikti në Sudan nisi në prill të vitit 2023, kur tensionet mes ushtrisë sudaneze dhe forcave paraushtarake rivale të quajtura Forcat e Mbështetjes së Shpejtë (RSF) shpërthyen në përleshje të armatosura. Deri më tani, mbi 20,000 persona janë vrarë, ndërsa miliona të tjerë po jetojnë në kushte katastrofike mes luftës dhe urisë.
Sudani ndodhet aktualisht në një nga krizat më të rënda humanitare në botë, ndërsa organizatat ndërkombëtare paralajmërojnë se situata mund të përkeqësohet nëse nuk ndërhyhet me ndihma urgjente dhe ndërmjetësim për paqe.
