Përplasja mes Presidentit Donald Trump dhe miliarderit Elon Musk ka shpërthyer sërish, këtë herë për shkak të paketës së shpenzimeve që Trump e ka cilësuar si “One Big Beautiful Bill”, një projektbuxhet me ndikim të madh fiskal dhe social.
Në një postim të hershëm në platformën e tij Truth Social këtë të martë, Trump akuzoi Elon Musk për përfitimin e shumtë të subvencioneve federale, duke thënë:
“Elon mund të ketë marrë më shumë subvencione se çdo njeri tjetër në histori, me shumë diferencë. Dhe pa to, ndoshta do i duhej të mbyllte bizneset dhe të kthehej në Afrikën e Jugut.”
Presidenti shtoi gjithashtu se Departamenti për Efiçencë Qeveritare (DOGE) – që dikur drejtohej nga vetë Musk para se të jepte dorëheqjen në fund të majit – mund të fillojë të hetojë aktivitetet e SpaceX dhe Tesla:
“Jo më lëshime raketash, satelitësh apo prodhim makinash elektrike – vendi ynë do të kursente një PASURI. Ndoshta DOGE duhet të bëjë një kontroll të mirë mbi këtë situatë? SHUMË PARA PËR T’U SHPËTUAR!”
Elon Musk kundërpërgjigjet: “Borxhi po shkatërron Amerikën”
Nga ana tjetër, Elon Musk ka intensifikuar sulmet ndaj paketës fiskale të Trump. Në një postim të drejtpërdrejtë në platformën X (ish-Twitter), ai shkroi:
“Çdo anëtar Kongresi që premtoi se do ulte shpenzimet dhe më pas votoi për rritjen më të madhe të borxhit në histori, duhet të ulë kokën nga turpi. Dhe do ta humbasin garën në zgjedhjet paraprake vitin tjetër, edhe nëse kjo është gjëja e fundit që bëj në këtë jetë.”
Musk gjithashtu kërkoi krijimin e një partie të re politike, të quajtur “America Party”, nëse projektligji kalon në Kongres.
“Nëse kjo paketë miratohet, kjo parti do të formohet ditën tjetër,” u shpreh ai.
Trump paralajmëron pasoja nëse Musk mbështet demokratët
Në një deklaratë për NBC News muajin e kaluar, Trump kishte paralajmëruar se do të kishte “pasoja serioze” nëse Musk financon kandidatët demokratë që garojnë kundër republikanëve të cilët mbështesin paketën buxhetore.
Projektligji i Trump synon zgjatjen e uljeve të taksave të mandatit të tij të parë, me një kosto prej 4.5 trilionë dollarësh, dhe rritjen e sigurisë kufitare. Por ky plan ka krijuar përçarje brenda vetë Partisë Republikane, pasi përfshin edhe shkurtimin e sigurimeve shëndetësore për miliona qytetarë me të ardhura të ulëta, duke rritur njëkohësisht ndjeshëm borxhin kombëtar.
“Gjithçka që po kërkoj është që të mos falimentojmë Amerikën”, tha Musk të martën në një tjetër reagim publik.
“Cili është kuptimi i një tavan borxhi nëse vazhdojmë ta rrisim atë?”
Kjo përplasje e re dëshmon për thellimin e përçarjes mes ish-aleatëve, ndërsa vendi përgatitet për një cikël të ri zgjedhor dhe për sfida të mëdha ekonomike.
