Sekretari i Përgjithshëm i NATO-s, Mark Rutte, bëri thirrje për një “kthesë të menjëhershme drejt një mentaliteti të kohës së luftës”, duke paralajmëruar se anëtarët e Aleancës nuk janë mjaftueshëm të përgatitur për kërcënimin e shtuar që paraqet Rusia.
“Kemi plane të forta ushtarake, gatishmëria e forcave tona është rritur, stërvitjet ushtarake janë më të mëdha dhe më të shpeshta. E gjithë kjo është thelbësore, por nuk mjafton për të përballuar rreziqet që na presin në katër apo pesë vitet e ardhshme. E përsëris: për të parandaluar luftën, duhet të përgatitemi,” tha Rutte, duke hapur sesionin dyditor të Komitetit Ushtarak të Aleancës.
Në këtë sesion, që u zhvillua të martën dhe të mërkurën në selinë e NATO-s në Bruksel, morën pjesë ministrat e mbrojtjes nga 20 vende anëtare të Aleancës Atlantike.
Në fjalimin e tij të parë të rëndësishëm që prej marrjes së detyrës në tetor, Rutte nënvizoi nevojën urgjente për të "forcuar më tej mbrojtjen tonë, duke shpenzuar më shumë për mbrojtje dhe duke prodhuar kapacitete mbrojtëse më të mëdha dhe më të mira”.
Kërcënimi nga Rusia dhe pasiguria nga SHBA
Rutte theksoi se Moska po përgatitet për një "përballje afatgjatë" me Ukrainën dhe NATO-n, duke e përshkruar situatën aktuale të sigurisë si më të rrezikshmen e jetës së tij. “Nuk jemi të përgatitur për atë që na pret pas katër apo pesë vitesh,” paralajmëroi ai, duke shtuar se vendet e NATO-s duhet të "përshpejtojnë ndjeshëm shpenzimet për mbrojtjen" për t’iu përshtatur realitetit të ri.
Ai theksoi gjithashtu nevojën për më shumë unitet dhe bashkëpunim midis anëtarëve dhe aleatëve globalë, duke thënë: “Siguria është një punë ekipore; sa më i madh të jetë ekipi, aq më të sigurt jemi të gjithë. Prioriteti im për të ardhmen është të sigurojmë që të veprojmë plotësisht dhe shpejt, si në ofensivën në Ukrainë, ashtu edhe në partneritete. Për këtë, mbështetem te angazhimi dhe mbështetja juaj e vazhdueshme.”
Komentet e Rutte-s vijnë disa javë para marrjes së detyrës nga Presidenti i zgjedhur i Shteteve të Bashkuara, Donald Trump, i cili ka vënë në dyshim angazhimin e Amerikës për të mbrojtur aleatët e NATO-s që nuk kanë buxhete të mjaftueshme për mbrojtjen.
Rutte shprehu urgjencën në prag të samitit të NATO-s në Hagë, që do të mbahet pas rreth pesë muajsh. “Qëllimi ynë është i qartë. Duhet të vazhdojmë të bëjmë gjithçka që mundemi për të mbajtur popujt tanë të sigurt. Në lojë është siguria jonë e ardhshme,” deklaroi ai.
Veprimet armiqësore të Rusisë
“Veprimet armiqësore ruse ndaj vendeve tona po përshpejtohen me sulme kibernetike, përpjekje për vrasje, akte sabotimi dhe të tjera,” tha Rutte. “I quajmë zakonisht veprime hibride, por në fakt janë veprime dhe fushata destabilizuese. Rusia po punon shumë për të dobësuar demokracitë tona dhe për të cënuar lirinë tonë, dhe nuk është e vetme: në krah të saj janë Kina, Koreja e Veriut dhe Irani.”
Në përfundim, Rutte theksoi mbështetjen për Ukrainën dhe rëndësinë e ndihmës ndaj Kievit për të ndryshuar drejtimin e luftës. “Të gjithë duam që lufta të përfundojë, por mbi të gjitha që paqja të jetë e qëndrueshme,” përfundoi ai.
