Adriatik Lapaj ka komentuar bashkëpunimin me partitë e reja për zgjedhjet e ardhshme parlamentare. Ai thotë se është ndjerë i refuzuar pasi u ka shtrirë dorën e bashkëpunimit për të treguar pjekuri politike, por ka marrë refuzim të vazhdueshëm.
Lidhur me përplasjen në protestë me militantët e lëvizjes “Bashkë,” Lapaj sqaron se kanë shkuar më shumë njerëz atje dhe jo për protagonizëm. “Unë shkova vetë për të marrë fjalën, nuk vura ndonjë tjetër, ndërsa zotëria pasi pa atë që aktivistët e vet bënë atë që bënë, iku dhe s’u duk më aty dhe s’i doli zot gjësë. Unë s’do lejoja kurrë që ta bënte një njeri atë që bënë me mua. Sepse shqiptari ka besë. Sepse dhe hasmi të vijë te shtëpia jote, nuk trajtohet ashtu,” tha Lapaj, duke përgënjeshtruar Arlind Qorin dhe qëndrimet e tij.
“E kam mbajtur veten që mos të jap modelin e rrugaçit. Më shtynë, se të jetë për forcë…” deklaroi më tej kreu i lëvizjes “Shqipëria Bëhet,” duke qartësuar edhe njëherë se bashkëpunimi me forcat e reja opozitare do të jetë i pamundur, përveç se me nismën “Thurje.”
Këto komente Lapaj i bëri teksa bisedonte me ndjekësit në rrjete sociale, së bashku me analistin Arjan Konomi, që tashmë është një nga figurat kryesore të “Shqipëria Bëhet.”
