Deputeti Enkelejd Alibeaj ka ngritur sot çështjen e zgjatjes së mandatit të prokurorëve të SPAK. Në mbledhjen e Komisionit të Ligjeve, ndër të tjera, ai kujtoi se ka një kërkesë, paraqitur nga SPAK dhe përfaqësues të SHBA, për atë që në zhargon njihet si zgjatja e mandatit të prokurorëve të SPAK.
“Ky parlament ka duartrokitur me hipokrizi mesa duket në 2016 për reformën në drejtësi. Madje ju thoni se jeni flamurtarë, i pari juaj e thotë, flamurtarë të reformës në drejtësi. Në fakt, sot ka ardhur koha, pa marrë flamurin askush, për të bërë një shërbim ndaj sistemit të drejtësisë. Kërkohet një ndryshim, një ndryshim kushtetues, që t’i japë mundësinë prokurorëve të SPAK të kenë të drejtën dhe ata të rikandidojnë, të riaplikojnë,” - tha deputeti Alibeaj, ndërsa shtoi se duket qartë se askush nuk flet.
“Në fakt, ky është një detyrim publik, që gjithsecili prej jush nuk duhet të ulë kokën, por duhet të shprehet dhe duhet tani. Kështu që dhe kjo është një nga çështjet që do duhet të marrë në mënyrë primare vendin e saj për ta diskutuar dhe për të treguar pastaj pozicionin e qartë dhe të sinqertë para drejtësisë. E duam apo s’e duam. Me votë,” - përfundoi fjalën e tij në Komisionin e Ligjeve Enkelejd Alibeaj.
