Lulzim Basha, Fatmir Mediu dhe Belind Këlliçi nuk e kanë humbur rastin të tregojnë se kanë qenë në një nga shumë ceremonitë e zhvilluara për inaugurimin e presidentit të ri Donald Trump. Me foto dhe video, duke përfshirë në debate edhe mbështetësit e tyre për “afërsinë” me të cilën i ka trajtuar presidenti i ri amerikan, tre politikanët nuk i kanë shpëtuar tundimit (tashmë të zakonshëm) të politikës shqiptare për t’u mburrur e publikuar foto në Uashington.
Vlen për t’u përmendur se zyrtarisht asnjë zyrtar i lartë i qeverisë shqiptare nuk ka qenë i ftuar në ceremoni. Madje, ftesat kanë qenë të limituara edhe për liderët ballkanikë. Por qasja për të postuar foto e politikanëve të opozitës, sikurse përpjekja qesharake e kryeministrit Rama për të penguar me KQZ pjesëmarrjen e ambasadorit të Shqipërisë në Uashington në ceremoni, tregon qartë se, pavarësisht dukjes moderne, ende politika mendon se fiton pikë duke publikuar foto të shkrepura rastësisht dhe pa asnjë protokoll. Nëse SHBA mbështesin ndonjë politikan të caktuar në Shqipëri apo nëse administrata e re ka të preferuarin e saj, këtë do e shohim në muajt dhe vitet në vazhdim. Asnjë foto pa protokoll nuk i ndërron qëndrimin departamentit të shtetit.
Është fushatë elektorale, e kuptojmë që ju duhen vota. Por mos do të ishte më mirë të takoni shqiptarët, t’i bindni për alternativën që do t’u ofroni, sesa të na mbushni mendjen se ju do Amerika me foto të marra vjedhurazi?
