Shteti i Arizonës ka ngritur padi kundër kompanisë franceze L’Oreal SA dhe filialit të saj në Shtetet e Bashkuara, duke e akuzuar gjigantin e kozmetikës se ka fshehur prova për rreziqet shëndetësore të produkteve për drejtimin kimik të flokëve.
Padia është depozituar të enjten në një gjykatë shtetërore nga Prokurorja e Përgjithshme e Arizonës, Kristin Mayes. Sipas Reuters, Arizona bëhet shteti i parë amerikan që padit L’Oreal për rreziqet e dyshuara të kancerit të lidhura me këto produkte.
Në padi pretendohet se L’Oreal ka shkelur ligjet për mbrojtjen e konsumatorit, duke tregtuar produktet e ashtuquajtura “hair relaxers” pa paralajmëruar përdorueset për rrezikun e mundshëm të kancerit ovarian dhe atij të mitrës.
Këto produkte përdoren kryesisht nga gratë afro-amerikane, pasi shërbejnë për drejtimin kimik të flokëve. Sipas padisë, kompania dyshohet se ka vazhduar t’i reklamojë dhe shesë ato, pavarësisht pretendimeve se ekzistonin të dhëna mbi lidhjen e tyre me sëmundje të rënda.
Çështja e ngritur nga Arizona vjen në një kohë kur L’Oreal përballet edhe me mijëra padi të ngjashme nga përdoruese dhe familjarë të tyre në SHBA. Paditë pretendojnë se ekspozimi ndaj këtyre produkteve ka shkaktuar ose ka rritur rrezikun për kancer te gratë që i kanë përdorur për vite me radhë.
Në qendër të çështjes është pyetja nëse kompania kishte dijeni për rreziqet e mundshme dhe nëse konsumatorët janë informuar siç duhet për to. Autoritetet e Arizonës kërkojnë që L’Oreal të mbahet përgjegjëse për mënyrën se si i ka tregtuar produktet dhe për mungesën e paralajmërimeve ndaj grave që i përdornin.
Padia e Arizonës mund të hapë një kapitull të ri ligjor për industrinë e kozmetikës, veçanërisht për produktet kimike të flokëve që prej vitesh janë pjesë e tregut amerikan dhe janë përdorur gjerësisht nga komunitete të caktuara të grave.
