Kryetari i Lëvizjes Bashkë, Arlind Qori ka ngritur akuza dhe ka kritikuar qendrimet e 3 kryetarëve të partive të reja, Lapaj, Soko dhe Shehaj.
Përplasjet fillimisht nisën gjatë protestës. Qori denoncoi Adriatik Lapaj për sjellje provokuese gjatë protestës së organizuar nga Lëvizja Bashkë, duke e akuzuar se tentoi të marrë fjalën me dhunë dhe të destabilizonte rendin e organizimit.
“Lapaj erdhi gjatë fjalimit tim dhe tentoi të marrë mikrofonin me dhunë. Kjo është një sjellje e papranueshme. Të shkosh në një protestë dhe të tentosh të prishësh rendin e saj, nuk ka ndodhur në 34 vite pluralizëm,” deklaroi Qori.
Ai vijoi me akuza, duke ngritur dyshime për lidhjet e mundshme të Lapajt me biznesmenin Samir Mane. “Dyshoj se Samir Mane, ashtu siç paguan Ramën dhe Berishën, mund ta ketë paguar edhe zotërinë,” tha Qori.
Qori e vijoi debatin me Pano Sokon, pasi e akuzoi për protagonizëm dhe hipokrizi.
Soko theksoi se sjellja e Qorit tregoi ego dhe mungesë bashkëpunimi. “Treguam papjekuri dhe egon që kemi. Në një rast kaq të rëndësishëm, duhet të ishim bashkë, jo të krijonim përçarje,” tha Soko.
Debati mbi protestën kaloi tek oligarkët dhe ndikimi i tyre.
Qori kritikoi heshtjen e mediave për rastin e një djali të lidhur me Samir Manen, duke e krahasuar me mbulimin e gjerë të rasteve të tjera. “Si ka mundësi që për Samir Manen nuk guxon të flasë askush? As Rama, as Berisha. Ky është treguesi më i qartë i pushtetit të tij,” tha Qori.
Shehaj e kundërshtoi, duke argumentuar se pushteti politik mbetet mbi atë të oligarkëve. “Ky tregimi se flitet për Ramën dhe jo për oligarkët është i pabazë. Rama është politikan, ndërsa Samir Mane është biznesmen,” tha Shehaj.
Debati mes tyre u përshkallëzua kur Shehaj ironizoi qëndrimet e Qorit, duke e akuzuar për mungesë koherence. “Kalove nga marksist në mbështetës të sipërmarrësve të ndershëm. Ky është një ndryshim radikal për një marksist si ti,” shtoi Shehaj.
Qori u mbrojt, duke theksuar se ka sipërmarrës të ndershëm, disa prej të cilëve janë pjesë e Lëvizjes Bashkë. “Oligarkët janë biznesmenë të pandershëm, dhe këtë e kam thënë gjithmonë,” përfundoi ai.
