Ish-trajneri i Liverpoolit dhe Borussia Dortmundit, Jurgen Klopp, ka kritikuar ashpër politikën e FIFA-s për pushimet e freskimit gjatë ndeshjeve të Kupës së Botës 2026, duke argumentuar se kjo masë po dëmton ritmin e lojës dhe po favorizon interesat komerciale.
Në një intervistë për televizionin gjerman ZDF, Klopp vuri në dyshim vendimin e FIFA-s për të vazhduar me këto ndërprerje në ndeshjet që zhvillohen në temperatura të larta. Rregulli, i cili u prezantua fillimisht gjatë Kupës së Botës 2014 në Brazil, parashikon një pushim prej tre minutash kur temperatura arrin ose kalon 32 gradë Celsius.
FIFA e ka justifikuar këtë praktikë si një masë për mbrojtjen e shëndetit dhe mirëqenies së futbollistëve, por tekniku gjerman nuk ndan të njëjtin mendim.
“Futbolli po mbahet peng nga drejtues që qëndrojnë të izoluar në zyra me ajër të kondicionuar”, deklaroi Klopp.
Ai shkoi edhe më tej, duke e cilësuar politikën e pushimeve për freskim si “një mburojë në emër të mirëqenies së lojtarëve”, ndërsa shtoi se, sipas tij, në realitet ato janë “një kafaz i artë i ndërtuar për sponsorët”.
Sipas Kloppit, këto ndërprerje prishin rrjedhën natyrale të ndeshjeve dhe ndikojnë negativisht në vetë thelbin e futbollit.
“Një ndeshje e Kupës së Botës duhet të rrjedhë si një lumë. Në vend të kësaj, ne po ndërtojmë diga në mes të lojës që reklamat të mund të kalojnë”, u shpreh ai.
Trajneri gjerman paralajmëroi se futbolli rrezikon të humbasë identitetin e tij përballë interesave tregtare.
“Është e rrezikshme për shpirtin e futbollit. Dikur futbolli ishte ngjarja kryesore, ndërsa tani rrezikon të shndërrohet në muzikë sfondi për një spektakël reklamash”, përfundoi Klopp.
FIFA ka konfirmuar se pushimet për freskim do të mbeten në fuqi edhe gjatë Kupës së Botës 2026, e cila do të zhvillohet në SHBA, Kanada dhe Meksikë.
