Teksa vëmendja publike mbetet e përqendruar te protestat që prej ditësh po mbahen në Tiranë, deputeti socialist Erion Braçe ka zgjedhur t’i drejtohet jo protestuesve, por vetë qeverisë dhe kryeministrit Edi Rama.
Në një reagim të gjatë publik, Braçe thekson se protesta është një e drejtë legjitime dhe një element thelbësor i demokracisë, ndaj qeveria duhet të mësohet me të dhe ta pranojë si pjesë normale të jetës demokratike.
“Protesta nuk është qeverisje”, shkruan Braçe, duke shtuar se puna e qeverisë nuk është të ankohet për protestat apo të merret me to, por të qeverisë vendin.
“Qeveria nuk është për të qarë protestën, me të e prej saj; qeveria është për të qeverisur! Qeverisni! Këtë bëni, qeverisni!”, shprehet deputeti socialist.
Braçe rendit më pas një sërë sfidash që sipas tij kërkojnë vëmendjen e menjëhershme të qeverisë, duke nisur nga përgatitja për sezonin e verës, rreziku i zjarreve, ndikimi i temperaturave të larta në shëndetin publik, furnizimi me ujë, mbrojtja e punëtorëve dhe menaxhimi i sezonit turistik.
Ai ngre gjithashtu shqetësimin se deri në fund të muajit maj shteti ka mbledhur më shumë të ardhura, por ka shpenzuar më pak nga sa ishte planifikuar, duke argumentuar se këto para duhet të kthehen në investime dhe shërbime për qytetarët.
Deputeti socialist përmend edhe disa premtime që sipas tij ende nuk janë realizuar, si mbështetja për nënat e fëmijëve me aftësi ndryshe, skema për fëmijët e porsalindur dhe zgjatja e lejes së lindjes.
Në fund të reagimit, Braçe përsërit se protestuesit po ushtrojnë një të drejtë demokratike, ndërsa përgjegjësia e qeverisë është krejt tjetër.
“Protesta është në rrugën e saj legjitime; protestuesit po bëjnë punën e tyre. Puna e qeverisë është të qeverisë vendin dhe të shërbejë. Nëse nuk e bën, kot që rri”, përfundon ai.
