Mesfushori i Kombëtares shqiptare, Ylber Ramadani, do të vazhdojë të jetë pjesë e Leçes edhe për dy sezone të tjera.
Klubi italian ka konfirmuar zyrtarisht rinovimin e kontratës së 29-vjeçarit deri në verën e vitit 2027, duke i dhënë fund spekulimeve që kanë qarkulluar muajt e fundit rreth të ardhmes së tij.
Lajmi nuk vjen si surprizë, pasi mediat italiane kishin raportuar që në janar për dëshirën e të dyja palëve për të vijuar bashkëpunimin. Tashmë marrëveshja është finalizuar dhe bërë publike nga drejtuesit e klubit të Serie A.
Ramadani është shndërruar në një nga lojtarët më të rëndësishëm të Leçes, duke fituar besimin e stafit teknik falë paraqitjeve të qëndrueshme dhe rolit të tij kyç në mesfushë.
Me këtë rinovim, Leçe siguron shërbimet e një prej futbollistëve më të rëndësishëm të skuadrës, ndërsa reprezentuesi kuqezi do të vijojë aventurën e tij në elitën e futbollit italian të paktën deri në verën e vitit 2027.
